Zibil konteynerində yeni doğulmuş körpə meyiti tapıldı: anası saxlanıldı

İstanbulun Beşiktaş rayonunun Ortaköy qəsəbəsində dəhşətli hadisə baş verib.

Sonxeber.az türk mediasına istinadən xəbər verir ki, rayonun Çevirmeci küçəsində tullantıları toplayan bələdiyyə işçiləri zibil konteynerində yeni doğulmuş körpənin meyitini aşkarlayıblar.

Hadisə yerinə polis və təcili tibbi yardım briqadası cəlb olunub. İlkin araşdırma zamanı körpənin göbək ciyəsinin yeni kəsildiyi, bədənində yanıq və kəsik izləri olduğu müəyyən edilib. Meyit ekspertiza üçün Ədli Tibb Qurumuna göndərilib.

Beşiktaş Rayon Polis İdarəsi və Asayiş Şöbəsinin Cinayət Axtarış Mərkəzi əməkdaşları qısa müddətdə körpəni zibilə atan şəxsin 39 yaşlı E.A. olduğunu müəyyən ediblər. Üç uşaq anası olan qadın saxlanılaraq polis bölməsinə aparılıb.

İlkin istintaq materiallarına görə, E.A. körpəni ev şəraitində dünyaya gətirib, daha sonra onu bir qutuya qoyaraq zibil konteynerinə atıb. Şübhəlinin bundan dərhal sonra yaxınlıqdakı marketə gedərək alış-veriş etdiyi də müəyyən olunub.

Polis, qadının doğum zamanı istifadə etdiyi qayçı ilə körpəyə xəsarət yetirərək ölümünə səbəb olması ehtimalını araşdırır. Hadisə ilə bağlı istintaq çoxşaxəli şəkildə davam etdirilir.

Telegramda izləyin