Polis əməkdaşı oğlu ilə mübahisə edən 6 yaşlı uşağı döydü

Elazığda bir polis əməkdaşı, oğlu ilə mübahisə edən 6 yaşlı uşağa fiziki müdaxilə etmək iddiası ilə vəzifəsindən uzaqlaşdırılıb.

Sonxeber.az türk mediasına istinadən xəbər verir ki, hadisə Abdullahpaşa qəsəbəsində yerləşən Işık parkında baş verib. Məlumata görə, parkda oynayan iki 6 yaşlı uşaq arasında yaranan mübahisəyə valideynlərdən biri – polis əməkdaşı müdaxilə edib və uşaqlardan birini döydüyü iddia olunub.

Məsələ ilə bağlı Elazığ Cumhuriyyət Baş Prokurorluğu tərəfindən araşdırma aparılır. Hadisəyə qarışan polis əməkdaşının vəzifədən uzaqlaşdırıldığı açıqlanıb.

Elazığ Valiliyinin yaydığı məlumatda bildirilib:

"Abdullahpaşa qəsəbəsində yerləşən Işık parkında baş verən hadisə ilə bağlı ictimaiyyətin düzgün məlumatlandırılması üçün açıqlama vermək zəruri hesab olunmuşdur. Parkda oynayan iki 6 yaşlı uşağın mübahisəsi zamanı valideynlərdən olan bir polis əməkdaşının olaya qarışdığı və uşağa fiziki müdaxilə etdiyi iddiası üzrə dərhal tədbir görülüb. Hazırda araşdırma Cumhuriyyət Baş Prokurorluğu tərəfindən davam etdirilir. Polis əməkdaşı işdən uzaqlaşdırılıb və əlavə olaraq inzibati araşdırma başladılıb."

Telegramda izləyin