17 yaşlı gənc restoranda işə qəbul olunmadığı üçün ofisiantı güllələdi - VİDEO

Adanada restoranın işə qəbuluna müraciət edən 17 yaşlı A.K., mənfi cavab aldıqdan sonra əsəbiləşərək orada çalışan ofisiant Nizamettin Yapaya silahla atəş açıb.

Sonxeber.az türk mediasına istinadən xəbər verir ki, hadisə Çukurova rayonunun Süleyman Dəmirəl bulvarında yerləşən restoranda, dünən saat 17:00 radələrində baş verib. İddiaya görə, bir müddət əvvəl restorana ofisiant kimi işə qəbul olunmaq üçün müraciət edən A.K., mənfi cavab aldıqdan sonra işçilərə qarşı kin bəsləməyə başlayıb.

Gənc, əlindəki sənədsiz silahla restorana gələrək Yapa ilə mübahisə edib və onun ayaqlarına atəş açıb. Yaralı Yapa qan içində yerə yıxılıb, şübhəli isə hadisə yerindən qaçıb.

Əraziyə çağırılan təcili tibbi yardım briqadası ilk müdaxilədən sonra 44 yaşlı Nizamettin Yapayı Adana Şəhər Təhsil və Tədqiqat Xəstəxanasına çatdırıb. Hadisədən qısa müddət sonra polis qrupları şübhəlini küçədə, istifadə etdiyi silahla birlikdə yaxalayıb.

A.K. polis idarəsindəki ifadəsindən sonra məhkəməyə çıxarılıb və barəsində həbs qətimkan tədbiri seçilib. Müalicəsi tamamlanan Nizamettin Yapa isə xəstəxanadan evə buraxılıb.

Telegramda izləyin