İnternat məktəbində qalmaqal: 8 şagirdin gözünə yuxuda yapışqan töküldü

Hindistanın şərqində yerləşən Orissa əyalətindəki internat məktəbində şok hadisə baş verib.

Sonxeber.az xarici mediaya istinadən xəbər verir ki, Kandhamal bölgəsinin Salaguda qəsəbəsində yerləşən məktəbin yataqxanasında qalan 8 şagird yuxuda olduqları vaxt yapışqanla hücuma məruz qalıb.

Məlumata görə, hadisə ötən cümə gecəsi baş verib. Şagirdlərin göz qapaqları yapışdıqdan sonra vəziyyət dərhal fərq edilib və onlar təcili şəkildə xəstəxanaya yerləşdiriliblər.

Həkimlərin açıqlamasına görə, vaxtında görülən tibbi müdaxilə nəticəsində uşaqlarda davamlı görmə itkisinin qarşısı alınıb. Müdaxilə zamanı şagirdlərin böyük ağrı yaşadığı bildirilib.

Hadisə ilə bağlı yüksək səviyyədə araşdırma başladılıb. Məktəbin direktoru isə vəzifə səlahiyyətlərini icra etməməsi səbəbindən işindən kənarlaşdırılıb.

Yerli mətbuat hadisəni "şagirdlərin zarafatı" kimi qiymətləndirsə də, məsələ ictimaiyyətdə ciddi narahatlıq yaradıb.

Telegramda izləyin