Evdən tonlarla zibil çıxarıldı: Ev sahibi barədə psixoloji problemlərinin olduğu iddia edilir

Bursanın Yıldırım rayonunun Yeşilyayla məhəlləsində daxil olan məlumat əsasında əraziyə bələdiyyə və polis əməkdaşları cəlb olunub.

Sonxeber.az türk mediasına istinadən xəbər verir ki, araşdırma zamanı uzun müddətdir ətrafa yayılan üfunət qoxularının mənbəyinin həmin ev olduğu müəyyənləşib.

Yıldırım Bələdiyyəsi tərəfindən aparılan təmizlik işləri zamanı evdə qapıdan içəri addım atmağa yer qalmayacaq qədər yığılmış zibillər aşkarlanıb. Gün boyu davam edən təmizləmə nəticəsində tonlarla zibil 3 yük maşınına yüklənərək ərazidən çıxarılıb.

Məhəllə sakinləri uzun müddətdir bu vəziyyətdən narazı olduqlarını bildirərək aidiyyəti qurumlara təşəkkür ediblər.

Ev sahibi barədə psixoloji problemlərinin olduğu iddia edilir. Hadisə ilə bağlı araşdırma aparılır.

Telegramda izləyin