Qız qaçırdıqdan sonra itən əmioğlanlarından 2,5 ildir xəbər yoxdur

Elazığın Kovancılar rayonunda 26 yaşlı Mustafa Yılmazın 21 yaşlı N.N.Y.-ni qaçıraraq evlənməsindən sonra Yılmaz ailəsi ilə qarşı tərəf arasında gərginlik yaranıb.

Sonxeber.az türk mediasına istinadən xəbər verir ki, hadisədən qısa müddət sonra, 22 yanvar bazar günü Mustafa Yılmaz qəfil yoxa çıxıb. Ertəsi gün isə onun əmisi oğlu Onur Yılmaz da itkin düşüb. Bunun ardınca ailənin şikayəti əsasında 02 fevral 2023-cü ildə Elazığ Polis İdarəsinin Asayiş Şöbəsi tərəfindən Kovancılar rayonunun Sürekli kəndində əməliyyat keçirilib. Əməliyyat zamanı aralarında Mustafa Yılmazın qaynatasının da olduğu 12 nəfər saxlanılıb, onlardan 5-i həbs olunub.

Aradan 2,5 il keçdikdən sonra, ötən cümə günü İl Jandarma Komandanlığı Asayiş Şöbəsi, Palu və Kovancılar Jandarma bölmələrinin iştirakı ilə daha bir əməliyyat təşkil olunub. Əməliyyat nəticəsində 12 nəfər şübhəli saxlanılıb.

İstintaqdan sonra 4 nəfər sərbəst buraxılıb, 8 nəfər isə Palu Məhkəməsinə göndərilib. Növbətçi Sulh Cəza Məhkəməsinin qərarına əsasən 3 nəfər məhkəmə nəzarəti şərti ilə sərbəst buraxılıb, 5 nəfər isə həbs edilərək həbsxanaya göndərilib.

Telegramda izləyin