Nikotin yaşlanmağın qarşısını ala bilər - Ekspertdən AÇIQLAMA

Məşhur uzunömürlülük eksperti Deyv Espri bildirir ki, nikotin az və nəzarət olunan dozada qəbul edilərsə, beyinin idrak funksiyalarını əhəmiyyətli dərəcədə yaxşılaşdıra bilər.

Lent.az xarici mediaya istinadla bildirir ki, ekspertin sözlərinə görə, nikotin siqaretdən fərqli olaraq beyinə müsbət təsir göstərə bilər.

Espri izah edir ki, nikotin beyindəki reseptorlara bağlanır və əsas neyromediatorların – asetilxolin, dopamin və noradrenalinin işini stimullaşdırır. Bu maddələr diqqət, yaddaş və öyrənmə üçün zəruridir.

Araşdırmalar göstərir ki, nikotin beynin yeni sinir əlaqələri yaratmaq qabiliyyətini artırır və bu, öyrənmə və yaddaş üçün vacibdir. Nikotin həmçinin BDNF adlanan neyrotrofik faktoru yüksəldir ki, bu da neyronların böyüməsinə və sağ qalmasına kömək edir.

Ekspert əlavə edir ki, nikotin hətta beyini yaşla bağlı dəyişikliklərdən qoruya bilər. Tədqiqatlara görə, az dozalarla qəbul edilən nikotin idrak pozuntusu olan insanlarda vəziyyəti yaxşılaşdıra və Parkinson xəstəliyində zədələnən dopamin istehsal edən neyronları qoruya bilər.

Espri xüsusilə vurğulayır ki, nikotini siqaret çəkməklə qarışdırmaq olmaz. Siqaret beyinin qocalma prosesini sürətləndirir, xroniki iltihab və oksidləşdirici stress yaradır. Buna görə o, siqaret və veyplərdən uzaq durmağı tövsiyə edir.

Onun məsləhəti yalnız əczaçılıq keyfiyyətli və zərərli əlavəsiz nikotin saqqızı, spreyi və ya plastırından istifadə etməkdir.

Telegramda izləyin