Barışığa gedən ana və iki oğlu qətlə yetirildi

Vanın Gürpınar rayonunda uzun müddətdir ədavət yaşayan iki ailənin barışmaq üçün təşkil etdiyi görüş silahlı hücuma çevrilib.

Sonxeber.az türk mediasına istinadən xəbər verir ki, hadisə zamanı ana və iki oğlu həyatını itirib, məsələ ilə bağlı 4 nəfər saxlanılıb.

Hadisə Gürpınarın Kırkgeçit məhəlləsində baş verib. Aslan və Özcan ailələri barışıq məqsədilə bir araya gəlib. Lakin görüş zamanı B.Ö. (70 yaş), oğulları S.Ö. (50 yaş) və O.Ö. (45 yaş) silahlı hücuma məruz qalıb. Atəş nəticəsində ana və iki oğlu hadisə yerindəcə dünyasını dəyişib.

Hadisə yerinə çağırılan təcili tibbi yardım qrupları onların öldüyünü təsdiqləyib. Meyitlər Van Məhkəmə-Tibbi Ekspertiza İnstitutuna göndərilib.

Polis hadisə ilə bağlı Aslan ailəsindən 4 nəfəri saxlayıb. İki ailə arasında gərginliyin davam etməsi səbəbindən bölgədə ciddi təhlükəsizlik tədbirləri görülüb, kəndin giriş-çıxışları nəzarətə alınıb.

Hadisə ilə bağlı istintaq davam edir.

Telegramda izləyin