Qayalıqdan ağzı daşla bağlanmış 20 günlük körpə tapıldı

Hindistanın Rajasthan ştatında qəribə hadisə baş verib.

Sonxeber.az türk mediasına istinadən xəbər verir ki, təxminən 20 günlük olduğu müəyyən edilən oğlan uşağı qayalıqda tapılıb, onun ağzına daş qoyulmuş və dodaqları yapışqanla bağlanmışdı. Məlumata görə, məqsəd körpənin ağlamasını susdurmaq və heç kəs fərq etmədən onu ölümə tərk etmək olub.

Hadisəni bölgədə qoyun otaran bir çoban aşkarlayıb. Səhər heyvanlarını otararkən daşların arasında kiçik bir bədən görüb. Yanaşdıqda gördüyü mənzərə onu şoka salıb. Körpə daş və zibillərin arasında əzab çəkir, dodaqları yapışqanla bağlanmış, ağzına zorla qoyulmuş daş nəfəs almasına mane olurmuş.

Çoban dərhal körpəni qucağına alaraq ən yaxın xəstəxanaya aparıb.

Həkimlərin araşdırmasına görə, körpənin yalnız ağzına deyil, həm də balaca ayaqları üzərinə daşlar qoyulmuşdu. Həyati təhlükəyə baxmayaraq, vaxtında müdaxilə nəticəsində körpə sağ qalıb və vəziyyəti günü-gündən yaxşılaşır.

Hadisədən sonra polis genişmiqyaslı araşdırmaya başlayıb.

Telegramda izləyin