Məktəbdə dəhşət: 2-ci sinif şagirdinin barmağı qopdu, müəllim dərsə davam etdi - VİDEO

Bursanın Osmangazi rayonunda yerləşən Setbaşı Dörçelik ibtidai məktəbində qan donduran hadisə baş verib.

Sonxeber.az türk mediasına istinadən xəbər verir ki, 2-ci sinif şagirdi Poyraz A.-nın əli sinif qapısına sıxılıb və o barmağını itirib.

İddialara görə, uşağın barmağı qopmasına baxmayaraq müəllim hadisəyə laqeyd yanaşıb və Poyraz bir dərs boyu qanlar içində sinifdə oturub. Hadisədən sonra uşağın valideynlərinə xəbər verilib.

Poyrazın anası Gamze T. məktəbə gələrək oğlunu öz imkanları ilə Bursa Şəhər Xəstəxanasına aparıb. Bu zaman uşağın qopan barmağı sinif yoldaşları tərəfindən məktəb dəhlizində tapılıb. Ailə, barmağı buz qutusunda xəstəxanaya çatdıraraq həkimlərə təqdim edib. Daha sonra uşaq Uludağ Universitetinə sevk olunub və uğurlu əməliyyatla barmaq yenidən tikilib.

Ana Gamze T. göz yaşları içində yaşadıqlarını belə ifadə edib:
"Məktəbə gəldiyimdə oğlumun barmağının sadəcə salfetlə sarıldığını gördüm. Öz imkanlarımızla xəstəxanaya apardım. Məktəb rəhbərliyinin təcili tibbi yardım çağırmaması ağlasığmazdır."

Ailə, səhlənkarlıqda günahlandırdıqları müəllim Ü.Ö.K.-dən şikayətçi olub. Polis hadisə ilə bağlı istintaqa başlayıb.

Valideynlər isə məktəb rəhbərliyi və müəllimlərin daha çox həssaslıq göstərməli olduqlarını bildirərək hadisəyə sərt reaksiya veriblər.

Telegramda izləyin