Sərxoş sürücü polisə: "Çörəyimi sənmi verəcəksən?"

Kayseridə sərxoş vəziyyətdə avtomobil idarə edən və özünü sürücü kimi təqdim edən şəxsin sürücülük vəsiqəsi əlindən alınıb.

Sonxeber.az türk mediasına istinadən xəbər verir ki, hadisə zamanı şübhəli polis əməkdaşlarına etiraz edərək: "Çörəyimi sənmi verəcəksən?" – deyə reaksiya göstərib.

Belə ki, Kayseri İl Təhlükəsizlik İdarəsi Yol Nəzarət Şöbəsi əməkdaşları, Kocasinan rayonunun Fevzi Çakmak məhəlləsində yerləşən Mustafa Kamal Paşa bulvarında yol-yoxlama tədbiri keçirib. Tədbir zamanı M.E. idarəsində olan 38 AHZ 299 dövlət qeydiyyat nişanlı avtomobil saxlanılıb.

Aparılan spirt testi nəticəsində M.E.-nin 2,03 promil sərxoş olduğu müəyyənləşdirilib. Vəsiqəsinin əlindən alınacağını anlayan sürücü, polis əməkdaşları ilə mübahisə edərək narazılıq bildirib.

Araşdırma zamanı məlum olub ki, M.E.-nin sürücülük hüququ daha əvvəl də əlindən alınıb. Bu dəfə isə ikinci dəfə sərxoş halda sükan arxasına keçdiyi üçün sürücülük vəsiqəsinə 2 il müddətinə qadağa qoyulub. Bundan əlavə, ona 11 min 622 TL məbləğində inzibati cərimə tətbiq olunub.

M.E. ifadə vermək üçün polis bölməsinə aparılıb.

Telegramda izləyin