Evinə qayıdan futbolçu gördüyü mənzərə qarşısında şok oldu - VİDEO

Meksikada çıxış edən argentinalı futbolçu Angel Correa evinin qarşısında qara ayı ilə üz-üzə gəlib.

Sonxeber.az türk mediasına istinadən xəbər verir ki, hadisə zamanı soyuqqanlı davranan Correa geri çəkilərək vəziyyətdən zərərsiz çıxıb.

Bir vaxtlar Atletico Madrid klubunun formasını geyinmiş futbolçu hazırda Meksikanın Tigres komandasında çıxış edir. Məlumata görə, Correa Monterrey şəhərindəki evinə qayıdarkən bağçasının qarşısında qəfil qarşısına çıxan ayını görüb. Həmin vaxt futbolçu uşağını qucağında daşıyırmış.

Ayının yaxınlaşdığını görən Correa panikaya düşmədən, gülümsəyərək arxaya çəkilib. Qısa müddətdə yayılan video sosial mediada minlərlə dəfə izlənilib. Azarkeşlər onun soyuqqanlı davranışını alqışlayıblar.

Bu mövsüm 8 milyon avro müqabilində Tigres klubuna transfer olunan 29 yaşlı futbolçu, yeni komandası ilə keçirdiyi 17 oyunda 9 qol və 1 assist ilə diqqət çəkib. Onun performansı yüksəlişdə olduğu bir vaxtda yaşanan bu hadisə Meksika mətbuatında geniş rezonans doğurub.

Yerli mediada bildirilib ki, Monterrey və ətraf ərazilərdə qara ayıların bəzən yaşayış məntəqələrinə endiyi, lakin adətən insanlardan uzaqlaşmağa meyilli olduqları müşahidə olunur.

Telegramda izləyin