ABŞ-da dəhşətli Tesla qəzası: Qapılar kilidləndi, 19 yaşlı qız avtomobilin içində yanaraq öldü

ABŞ-ın Kaliforniya ştatında baş verən ağır yol-nəqliyyat hadisəsində 19 yaşlı tələbə Krysta Mişel Tsukahara faciəvi şəkildə həyatını itirib.

Sonxeber.az xarici mediaya istinadən xəbər verir ki, gənc qız, idarəetməni itirən Tesla Cybertruck markalı avtomobilin ağaca çırpılmasından sonra alov alması nəticəsində avtomobilin içində yanaraq ölüb.

Hadisə zamanı məlum olub ki, avtomobilin qapıları çarpışmadan sonra kilidlənib və elektron sistem nasazlığı səbəbindən açıla bilməyib. Manuel təcili çıxış mexanizmi isə o panika anında tapıla bilməyəcək qədər gizli yerdə yerləşib. Krysta arxa oturacaqda sıxışaraq alovun içində qalib.

Qəza hesabatına əsasən, Krysta çarpışmadan sonra yalnız yüngül xəsarət almışdı və vaxtında avtomobildən çıxa bilsəydi, sağ qalacaqdı. Lakin avtomobilin batareyası partlayıb, bir neçə saniyə ərzində alov bütün maşını bürüyüb.

Krystanın atası Karl Tsukahara, The New York Times-a açıqlamasında şirkətə qarşı qəzəbini gizlətməyib:

"Qızım sağ qala bilərdi. Amma avtomobilin dizaynı buna imkan vermədi. Təcili çıxış qolu tapmaq bu qədər çətin olmamalıdır. Bu qədər bahalı bir avtomobildə belə bir səhv necə ola bilər, anlamıram".

Ailənin vəkili Roger Dreyer isə bildirib ki, məqsədləri yalnız təzminat deyil, həqiqətin üzə çıxmasıdır:

"Bu avtomobilin dizaynı insan həyatı üçün ciddi təhlükə yaradır".

Avtomobildə Krysta ilə birlikdə daha üç gənc olub. Sürücü – 19 yaşlı Soren Dixonun qanında yüksək miqdarda alkoqol və kokain aşkarlanıb. Qəza nəticəsində yalnız Jordan Miller sağ qalıb. Hadisə şahidlərindən biri ağaç budağı ilə avtomobilin şüşəsini sındıraraq Milleri xilas edə bilib.

Kaliforniya Yol Polisi qəzanın sürət həddi, alkoqol və narkotik maddələrin təsiri altında idarəetmə itkisindən qaynaqlandığını açıqlayıb.

Bu hadisə, Tesla avtomobillərinin qapı dizaynı və yanğın təhlükəsizliyi ilə bağlı mübahisələri yenidən gündəmə gətirib.

Telegramda izləyin