"Türkiyə, Azərbaycan və Gürcüstanın bir masa arxasında toplanması regionda sabitliyin qorunması deməkdir" - AÇIQLAMA

Ankarada Türkiyə, Azərbaycan və Gürcüstan müdafiə nazirlərinin üçtərəfli toplantısı keçirilir.

Bu barədə Türkiyə Milli Müdafiə Nazirliyi məlumat yayıb.

Toplantı çərçivəsində Türkiyənin milli müdafiə naziri Yaşar Güler, Azərbaycan müdafiə naziri general- polkovnik Zakir Həsənov və Gürcüstanın baş nazir müavini, müdafiə naziri İrakli Çixovanini Ankara Mərkəzi Zabitlər Evində qəbul edib.

Nazir Yaşar Güler əvvəlcə Azərbaycan müdafiə naziri Zakir Həsənovla görüşüb. Daha sonra o, Gürcüstan müdafiə naziri İrakli Çixovani ilə də ikitərəfli görüş keçirəcək.

Görüşlərdə regional təhlükəsizlik, hərbi əməkdaşlıq və birgə təlimlərin keçirilməsi kimi məsələlərin müzakirə olunacağı gözlənilir.

"Ankarada keçirilən Türkiyə–Azərbaycan–Gürcüstan müdafiə nazirlərinin üçtərəfli toplantısı Cənubi Qafqazda yeni təhlükəsizlik arxitekturasının formalaşmasının göstəricisidir. Bu format artıq diplomatik jest səviyyəsindən çıxaraq, strateji əməkdaşlıq modelinə çevrilib. Türkiyə, Azərbaycan və Gürcüstanın bir masa arxasında toplanması regionda sabitliyin qorunması və güc balansının düzgün qurulması baxımından mühüm siqnaldır" , - bunları Sonxeber.az -a açıqlama verən politoloq Tural İsmayılov deyib:

"Nazir Yaşar Gülerin Azərbaycan müdafiə naziri general-polkovnik Zakir Həsənovla görüşü hərbi koordinasiyanın dərinləşdiyini göstərir. Bu əməkdaşlıq sadəcə təlimlər və protokollarla məhdudlaşmır, eyni zamanda müdafiə sənayesi və texnoloji inteqrasiya istiqamətində konkret planları əhatə edir. Gürcüstanın bu platformada iştirakı regionda balanslaşdırılmış siyasətin qorunması üçün vacibdir.

Toplantıda regional təhlükəsizlik məsələlərinin müzakirəsi onu göstərir ki, Cənubi Qafqazda sülhün təminatı artıq region ölkələrinin öz əlindədir. Türkiyə və Azərbaycanın hərbi təcrübəsi ilə Gürcüstanın strateji mövqeyi birləşəndə, ortaya real müdafiə sinerjisi çıxır. Bu, həm də bölgəyə kənardan təzyiq göstərmək istəyən qüvvələrə cavabdır.

Əslində, üçtərəfli format NATO və Avropa təhlükəsizlik sisteminə də dolayısı ilə mesaj verir – Cənubi Qafqaz artıq sabitlik idxal edən deyil, sabitlik ixrac edən regiondur. Azərbaycanın hərbi diplomatiyası bu modeldə aparıcı rol oynayır. Qardaş Türkiyənin dəstəyi ilə həyata keçirilən birgə təlimlər region ordularının qarşılıqlı işləmə qabiliyyətini artırır.

Ankara görüşü həm də enerji və kommunikasiya xətlərinin təhlükəsizliyini təmin edən strateji çərçivə kimi əhəmiyyət daşıyır. Bu formatın davamlılığı gələcəkdə müdafiə alyansının konturlarını da müəyyənləşdirə bilər. Toplantı bir daha sübut etdi ki, Qafqazda sabitliyin açarı Ankara və Bakının əlindədir. Azərbaycanın bu prosesdəki mövqeyi rasional, balanslı və uzaqgörən siyasətin nümunəsidir.

Nəticə olaraq, Ankaradakı görüş Cənubi Qafqazda təhlükəsizliyin yalnız regional həmrəyliyə əsaslandığı reallığını təsdiqlədi. Bu, həm də Türk dünyasının hərbi-siyasi əməkdaşlığının təbii davamıdır və regionun gələcək təhlükəsizlik sisteminin istiqamətini müəyyənləşdirən strateji hadisə kimi yadda qalacaq".

Telegramda izləyin