"Trampın Putinə yönəlik "əgər həll etməsə, pis başa çatacaq" ifadəsi, əslində açıq xəbərdarlıq tonundadır" - AÇIQLAMA

ABŞ Prezidenti Donald Tramp bildirib ki, rusiyalı həmkarı Vladimir Putin Ukrayna ilə münaqişəni həll etməsə, bu onun üçün pis başa çatacaq.

Ağ Ev rəhbəri hesab edir ki, Rusiya Prezidenti gərgin vəziyyəti həll edə bilsəydi, əla görünərdi.

"Düşünürəm ki, o, bunu həll edəcək. Ancaq hər halda biz hərəkət edəcəyik. Əgər həll etmsə, bu onun üçün pis başa çatacaq", - Tramp deyib.

ABŞ Prezidenti, həmçinin Rusiya-Ukrayna münaqişəsinin həll olunmayacağı təqdirdə "Tomahawk" raketlərinin Kiyevə verilməsi imkanlarını güman edir. Trampın sözlərinə görə, o, Putinlə bu mövzuda danışa bilər.

"Donald Trampın bu açıqlaması, onun prezidentliyə qayıtdıqdan sonra xarici siyasətdə sərt, amma eyni zamanda praqmatik xətt izləyəcəyini göstərir" , - bunu Sonxeber.az -a açıqlama verən politoloq Tural İsmayılov deyib:

"Trampın Putinə yönəlik "əgər həll etməsə, pis başa çatacaq" ifadəsi, əslində açıq xəbərdarlıq tonundadır. Bu, həm də ABŞ-ın Rusiya ilə münasibətlərdə diplomatik çevrədən kənara çıxaraq təzyiq mexanizmini aktiv saxlamaq niyyətini göstərir. Tramp bir tərəfdən Putinlə dialoq imkanını qoruyur, digər tərəfdən isə hərbi variantı masadan tam qaldırmır. Bu, onun tipik "müqavilə təzyiqi" siyasətidir — əvvəl hədələyir, sonra danışıqlar üçün qapı saxlayır.

"Tomahawk" raketlərinin Ukraynaya verilməsi məsələsi isə oyunun qaydalarını dəyişə bilər. Belə bir addım Moskva üçün ciddi siqnal və eskalasiya riski deməkdir. Tramp, görünür, həm Putini danışıqlara təşviq etmək, həm də Zelenskiyə psixoloji dəstək vermək istəyir. Bu situasiyada Vaşinqton həm Rusiya üzərində təzyiqi artırır, həm də Ukraynanın silah arsenalını genişləndirməklə balans yaradır. Trampın ritorikasında bir məqsəd aydın görünür – sülhü özünün siyasi qələbəsinə çevirmək.

Zelenskinin "Trampın qərarını gözləyirik" deməsi də göstərir ki, Kiyev indi Ağ Evin növbəti addımını həlledici amil kimi görür. Ukrayna üçün "Tomahawk"lar həm müdafiə, həm də siyasi mesaj vasitəsidir. Əgər bu silahlar verilsə, Rusiya cəbhəsindəki balans ciddi şəkildə dəyişə bilər. Amma Trampın taktikasını tanıyanlar bilirlər ki, o, istənilən hərbi qərarı iqtisadi və diplomatik güzəşt qarşılığında verir.

Nəticə etibarilə, Trampın bu bəyanatı həm Moskvaya, həm Kiyevə, həm də NATO müttəfiqlərinə ünvanlanmış çoxqatlı mesajdır. O, özünü "dünyanı razı sala bilən lider" kimi təqdim etməyə çalışır. Lakin Putinin bu cür açıq təhdidlər qarşısında geri çəkiləcəyi real görünmür. Trampın dediyi "pis başa çatacaq" ssenarisi isə, əgər diplomatiya işləməsə, yeni gərginlik dalğasına çevrilə bilər. Bu, ABŞ-Rusiya münasibətlərində yeni soyuq dövrün başlanğıcına da siqnal ola bilər".

Telegramda izləyin