Əfqanıstanda hamilə həyat yoldaşını və bir kişini qətlə yetirən şəxs stadionda edam edildi

Əfqanıstanın Bəğdis vilayətində hamilə həyat yoldaşını və bir kişini öldürən şəxs, Taliban rəhbərliyinin "qisas" cəzası çərçivəsində ictimaiyyətin gözü qarşısında edam edilib.

Sonxeber.az türk mediasına istinadən xəbər verir ki, hadisə vilayətin paytaxtı Kala-i-Nav şəhərində yerləşən idman stadionunda baş verib və edama minlərlə insan tamaşa edib.

Əfqanıstanın Ali Məhkəməsi tərəfindən yayılan məlumatda bildirilib ki, təqsirləndirilən şəxs üç məhkəmə qərarından və Taliban lideri Hibatullah Axundzadənin rəsmi təsdiqindən sonra ölüm hökmünə məhkum edilib. Cəza, qurbanların yaxınlarından biri tərəfindən yerinə yetirilib.

Bəğdis vilayətinin informasiya məsələləri üzrə nümayəndəsi Mətilullah Muttaqi, jurnalistlərə açıqlamasında bildirib:

"Bu şəxs bir kişini və səkkiz aylıq hamilə olan həyat yoldaşını qətlə yetirib. Məhkəmə hadisənin ağırlığını nəzərə alaraq qisas cəzasına qərar verib".

Telegramda izləyin