İki nəfərin öldürüldüyü hadisədən sonra daha bir meyit tapıldı – polis əlaqəni araşdırır

Balıkesirin Edremit rayonunda iki nəfərin öldürüldüyü, yeddi nəfərin isə yaralandığı hadisə ilə bağlı istintaq davam edərkən, rayon daha bir cinayət xəbəri ilə sarsılıb.

Sonxeber.az türk mediasına istinadən xəbər verir ki, hadisə gecə saatlarında İkizçay məhəlləsində baş verib. Bir mənzilin pəncərəsində qırıq şüşə və qan izləri görən sakinlər dərhal polisə məlumat veriblər. Əraziyə polis, təcili yardım və yanğınsöndürmə briqadaları cəlb olunub.

Çilingirin köməyi ilə mənzilə daxil olan polis əməkdaşları Olcay Ö. adlı şəxsin meyitini aşkarlayıblar. İlkin araşdırma nəticəsində onun odlu silahla vurularaq öldürüldüyü müəyyən edilib. Meyit araşdırılma üçün Bursa Ədli Tibb İnstitutunun morquna göndərilib.

Xatırladaq ki, Edremitdə bir müddət əvvəl Mustafa Emlik adlı həbsxanadan qaçan məhkum, xüsusi təyinatlı çavuş Kemal Ekrini qətlə yetirib, onun avtomobilini ələ keçirərək qaçmışdı. Daha sonra bir nəfəri də öldürən və yeddi nəfəri yaralayan Emlik, polis ilə silahlı qarşıdurma zamanı öldürülmüşdü.

Hazırda polis hər iki hadisə arasında mümkün əlaqəni araşdırır.

Telegramda izləyin