Şəhərin mərkəzi küçələrinin birində şübhəli çanta təşviş yaratdı

Kırıkkale şəhərinin ən işlək nöqtələrindən biri olan Zafer prospektində səki üzərində qoyulmuş şübhəli çanta əhali arasında təşvişə səbəb olub.

Sonxeber.az türk mediasına istinadən xəbər verir ki, hadisə şahidlərinin verdiyi məlumata görə, səki üzərində sahibisiz çantanı görən vətəndaşlar dərhal 112 Təcili Çağrı Mərkəzinə məlumat veriblər. Qısa müddətdə hadisə yerinə polis qüvvələri cəlb edilib. Ərazi təhlükəsizlik lentilə bağlanaraq həm piyadaların, həm də nəqliyyat vasitələrinin hərəkəti məhdudlaşdırılıb.

Maraqla prospektdə toplaşan vətəndaşlar təhlükəli sahədən uzaqlaşdırılıb, hadisə yerinə bomba zərərsizləşdirmə qrupu çağırılıb. Mütəxəssis xüsusi geyimdə çantanı fünyə vasitəsilə nəzarətli şəkildə partladıb.

Partlayışdan sonra çantanın içərisindən poket, qəzet və kağız parçaları çıxıb. Polis araşdırma apardıqdan sonra prospekt yenidən piyadaların və avtomobillərin hərəkətinə açılıb.

Hadisə şəhərdə qısa müddətli qorxu yaratsa da, təhlükə olmadığı sonradan müəyyən edilib.

Telegramda izləyin