80 yaşlı 3 dostun əyləncə gecəsi xəstəxanada bitdi

Türkiyənin Bursa şəhərinin Osmangazi rayonunda 80 yaşlarındakı üç kişi evdə birlikdə alkoqol qəbul etdikdən sonra qəfildən özlərini pis hiss ediblər. İlk anda təbii qaz sızmasından zəhərləndiklərini düşünərək yardım istəyən yaşlı şəxslərin xəstəxanadakı müayinələrindən sonra isə tamamilə fərqli bir həqiqət ortaya çıxıb.

Sonxeber.az türk mediasına istinadən xəbər verir ki, evdə alkoqol alan yaşlı dostlar bir müddət sonra haldan düşərək 112 Təcili Tibbi Yardım Xidmətinə zəng vurublar və təbii qazdan zəhərləndiklərini bildiriblər. Çağırış əsasında hadisə yerinə polis və tibbi briqadalar cəlb olunub. Huşunu itirmiş vəziyyətdə tapılan şəxslərə ilkin tibbi yardım göstərilib və onlar müxtəlif xəstəxanalara aparılıb.

Hadisənin baş verdiyi evdə qaz sızması ehtimalına qarşı mütəxəssislər tərəfindən genişmiqyaslı yoxlama aparılsa da, heç bir qaz sızması aşkar olunmayıb.

Xəstəxanada aparılan analizlər nəticəsində isə yaşlı kişilərin qazdan deyil, qəbul etdikləri yüksək dərəcəli spirtli içkilərdən zəhərləndiyi məlum olub. Xoşbəxtlikdən, hər üç şəxsin vəziyyətinin yaxşı olduğu bildirilib.

Hadisə ilə bağlı araşdırma aparılır.

Telegramda izləyin