İşsiz qalıb əkdi, həyatı dəyişdi! İndi kilosunu 200 minə satır

Hakkarinin Yüksekova rayonunda yaşayan Kerim Erişmiş işsizliklə mübarizə aparmaq və kənd təsərrüfatını canlandırmaq məqsədilə zəfəran istehsalına başlayıb.

Sonxeber.az türk mediasına istinadən xəbər verir ki, bölgənin iqlimi və torpaq quruluşu bu məhsullar üçün çox əlverişlidir.

Erişmiş ilk zəfəranı yığıb, lakin yüksək xərclər səbəbindən istehsalı məhdud şəkildə davam etdirdiyini deyib:

"Zəfəran üzərində təsərrüfat qurmuşam. Keçən il əkdiyimiz zəfəranları iyunda yığdıq. Bu il isə Kənd Təsərrüfatı Nazirliyinin və yerli idarələrin dəstəyi ilə safran əkdik, müəyyən miqdarda subsidiya verildi. İndi çiçəklər açmağa başlayıb, təxminən iki həftə davam edəcək. Əgər bu məhsul bölgədə yayılarsa, həm məşğulluq artar, həm də kənd təsərrüfatına maraq yenidən canlanar."

Fermer qeyd edib ki, zəfəran soyuğa davamlı bitkidir və üç il torpaq altında qala bilir. Buna baxmayaraq, o, dəstəyin kifayət etmədiyini vurğulayıb:

"Zəfəranın bir ədədinin qiyməti 15-20 min lirə arasında dəyişir. Bu xərclərlə fermerin təkbaşına istehsal aparması çox çətindir."

Kerim Erişmiş dövlət dəstəklərinin artırılacağı təqdirdə istehsalını genişləndirəcəyini və ən azı 2-3 nəfərə iş imkanı yarada biləcəyini bildirib:

"Araşdırmalara görə zəfəranın kilosu 200–300 min lirə arasında dəyişir. Bu məhsul Yüksekova üçün böyük bir iqtisadi fürsət ola bilər."

Beləliklə, Yüksekovalı fermerin təşəbbüsü həm işsizliyə qarşı ümid, həm də bölgədə kənd təsərrüfatının dirçəlməsi üçün yeni bir addım kimi dəyərləndirilir.

Telegramda izləyin