Dəhşətli ailə faciəsi: Ata oğlunu qətlə yetirdi, həyat yoldaşını yaraladı - VİDEO

İzmirin Tire rayonunda dəhşətli ailə faciəsi baş verib.

Sonxeber.az türk mediasına istinadən xəbər verir ki, ata evdə həyat yoldaşı və oğlu ilə mübahisə etdikdən sonra ov tüfəngi ilə onlara atəş açıb. Hadisə nəticəsində oğlu həyatını itirib, həyat yoldaşı isə ağır yaralanıb.

Hadisə axşam saatlarında Dallık məhəlləsində baş verib. İlkin məlumata görə, 55 yaşlı Ş.K. hələlik müəyyən edilməyən səbəbdən oğlu 28 yaşlı Aşkın Kaya və həyat yoldaşı 50 yaşlı Gülşən Kaya ilə mübahisə edib. Mübahisə qızışdıqdan sonra əsəblərinə hakim ola bilməyən ata, evdə olan av tüfəngi ilə əvvəl oğluna, sonra isə həyat yoldaşına atəş açıb.

Silah səslərini eşidən qonşular dərhal hadisə barədə 112 Təcili Yardım Mərkəzinə məlumat veriblər. Hadisə yerinə gələn təcili yardım əməkdaşları Aşkın Kayanın artıq həyatını itirdiyini, Gülşən Kayanın isə ağır yaralandığını müəyyənləşdiriblər. Yaralı qadın Tire Dövlət Xəstəxanasına aparılaraq müalicəyə götürülüb.

Hadisədən sonra qaçan ata Ş.K.-nın saxlanılması üçün jandarma əməkdaşları əməliyyat-axtarış tədbirlərinə başlayıblar.

Hadisə ilə bağlı istintaq davam edir.

Telegramda izləyin