Avtomobilində ölü tapılan şəxsin bədənində zorakılıq izləri aşkarlanıb – Qətl ehtimalı araşdırılır

Türkiyənin Adana şəhərində müəmmalı ölüm hadisəsi baş verib.

Sonxeber.az türk mediasına istinadən xəbər verir ki, 54 yaşlı İlyas Ünalan Çukurova rayonunun Toros məhəlləsində idarə etdiyi avtomobildə ölü halda tapılıb.

Hadisə şahidlərinin bildirdiyinə görə, Ünalan avtomobilini idarə etdiyi zaman qəfil özünü pis hiss edib və avtomobil yolun ortasında dayanıb. Ətrafdakı vətəndaşlar dərhal polisə və təcili yardıma məlumat veriblər.

Hadisə yerinə gələn tibbi yardım əməkdaşları İlyas Ünalanın artıq dünyasını dəyişdiyini müəyyən ediblər.

İlkin araşdırma aparan Asayiş Şöbəsinin Cinayət Axtarış Bölməsi əməkdaşları, mərhumun bədənində zorakılıq izləri aşkar ediblər. Meyit məhkəmə-tibbi ekspertizanın aparılması üçün Adana Ədli Tibb Qurumu morquna göndərilib.

Hadisə ilə bağlı cinayət işi açılıb, istintaq çərçivəsində eyni ailədən olan O.C., G.C. və N.C. adlı şəxslər polis tərəfindən saxlanılıb.

Qətl ehtimalı üzərində araşdırmalar davam edir.

Telegramda izləyin