Saxta bilərzikləri əsl qızıllarla dəyişmək istəyərkən yaxalanan qadın "Uşaqlarım var, etməyin" deyə yalvardı - VİDEO

Türkiyənin Aksaray şəhərində qeyri-adi hadisə baş verib.

Sonxeber.az türk mediasına istinadən xəbər verir ki, 28 yaşlı K.Ş. adlı qadın, qolundakı saxta bilərzikləri qızıl mağazasında əsl qızıl bilərziklərlə dəyişməyə cəhd edib. Qadın polis tərəfindən hadisə yerində, cinayət başında yaxalanıb.

Hadisə Aksaray şəhərinin mərkəzində yerləşən Qapalı Çarşıda baş verib. Qadın əvvəlcədən qoluna taxdığı 2 ədəd saxta burma bilərziklə zərgərin yanına gələrək, həmin modelin "eynisini almaq istədiyini" deyib. Zərgər ona baxmaq üçün əsl qızıl bilərziklər təqdim edib. Qadın bu fürsətdən istifadə edərək öz qolundakı saxta bilərzikləri çıxarıb, onların yerinə zərgərin verdiyi əsl qızılları taxıb.

Lakin diqqətli zərgər vəziyyəti hiss edərək, sakit şəkildə obyektdəki təcili xəbərdarlıq düyməsinə basıb. Hadisə yerinə polis əməkdaşları cəlb olunub və qadın saxta bilərziklərlə birlikdə cinayət başında tutulub.

Bu anlarda zərgərlikdə təsadüfən olan və özünü vəkil kimi təqdim edən bir şəxs, polisə müraciət edərək,
"Onun tutularaq həbsdə mühakimə olunması üçün əlimdən gələni edəcəyəm," – deyib.

Qadın isə gözyaşları içində,
"Uşaqlarım var, abi etmə, xəstə uşağım var, qurban olum etmə," – deyə yalvarıb.

Polis qadını saxlayaraq bölməyə aparıb. Zərgər öz qızıl bilərziklərini geri alıb, saxta bilərzikləri isə polisə təhvil verib.

Hadisə ilə bağlı Aksaray Respublika Prokurorluğu tərəfindən istintaq başladılıb.

Telegramda izləyin