Şəhid atasına hörmətsizlik edən sürücü işdən çıxarıldı - VİDEO

Türkiyənin Sivas şəhərində fəaliyyət göstərən özəl ictimai avtobus sürücüsünün şəhid atasına qarşı sərgilədiyi hörmətsiz və aqressiv davranış cəmiyyətin kəskin etirazına səbəb olub. Hadisə şəhərin Çayboyu Mahallesi istiqamətində hərəkət edən marşrut xəttində baş verib.

Sonxeber.az türk mediasına istinadən xəbər verir ki, məlumata görə, sürücü dayanacaqda olan sərnişinləri – o cümlədən şəhid atası K.D.K.-nı avtobusa minməsinə icazə vemədən, oradan uzaqlaşıb. Təxminən bir saat sonra eyni dayanacağa qayıdan sürücü, sərnişinlərin haqlı narazılığı ilə qarşılaşıb.

Bu zaman o, sərnişinlərin üzərinə gedərək onlara qarşı aqressiv davranıb, şəhid atasına isə "dilənçi" deyə təhqiramiz ifadə işlədib və onu fiziki təzyiqlə hədələyib. Hadisə digər sərnişinlər tərəfindən mobil telefonla qeydə alınıb.

Məsələ ilə bağlı açıqlama verən Sivas Şəhid Ailələri və Qaziləri Sosial Yardımlaşma və Dəyanət Dərnəyinin sədri Fatih Deveci, olayı qəti şəkildə qınayaraq bildirib:

"Şəhidlərimizin qanı ilə qorunan bu torpaqlarda onların valideynlərinə, həyat yoldaşlarına və övladlarına əl qaldırmaq, hörmətsizlik etmək heç kimin haqqı deyil".

Dərnək rəhbəri, hadisənin ardından aidiyyəti qurumlarla əlaqə saxladıqlarını, şəhid atasının hüquqlarının qorunması və ədalətin bərqərar olunması üçün zəruri addımlar atıldığını da qeyd edib.

"Şəhidlərimizin müqəddəs xatirəsinə və qazilərimizin şərəfinə uzanan hər əl, millətimizin birgə iradəsi ilə cavabını alacaq. Biz bu vətən üçün canını fəda edən qəhrəmanların əmanətlərinə sonadək sahib çıxacağıq", – deyə Fatih Deveci vurğulayıb.

Məsələ ilə bağlı aparılan araşdırmalar nəticəsində həmin avtobus sürücüsü ilə bağlı inzibati tədbir görülüb. İşdən çıxarılan sürücüyə inzibati cərimə tətbiq olunub.

Telegramda izləyin