"Qubadlının azadlığı təkcə bir şəhərin deyil, bütövlükdə Zəngəzur istiqamətinin açarı idi" - DEPUTAT

"25 oktyabr tarixi Azərbaycan xalqının yaddaşında əbədi qürur, iftixar və zəfər səhifəsi kimi yer alır. 2020-ci il oktyabrın 25-də Qubadlı şəhəri və onun ətraf kəndləri düşmən işğalından azad edildi. Bu qələbə təkcə hərbi uğur deyil, eyni zamanda xalqımızın milli iradəsinin, birliyinin və sarsılmaz əzminin təcəssümü idi.
Prezident İlham Əliyev Qubadlı əməliyyatının strateji əhəmiyyətini vurğulayaraq bildirmişdir:
"Qubadlı əməliyyatının çox böyük əhəmiyyəti var idi. Çünki Qubadlıdan sonra biz Şuşa şəhərini işğaldan azad etdik. Oktyabrın 25-də Qubadlı azad olundu və noyabrın 8-də Şuşa şəhəri azad edildi. Beləliklə, düşmən təslim olmağa məcbur oldu".
Ermənistan və Dağlıq Qarabağla sərhəddə yerləşən Qubadlı 1988-ci ildən başlayaraq düşmən təcavüzünə məruz qalmış və 1993-cü ilin avqustunda tamamilə işğal olunmuşdur. Azərbaycan xalqı həm Birinci, həm də İkinci Qarabağ müharibəsində Qubadlı uğrunda böyük qəhrəmanlıq və fədakarlıq göstərmişdir. Bu torpaq uğrunda canını fəda etmiş qəhrəmanların müqəddəs xatirəsi daim ehtiramla yad olunur, onların şücaəti xalq yaddaşında əbədi yaşayır".

Bu sözləri Sonxeber.az-a Milli Məclisin deputatı Mahir Süleymanlı danışıb.

O, açıqlamasında qeyd edib ki, Qubadlı işğaldan azad olunduqdan sonra burada həyat yenidən canlanır: ilk "ağıllı kənd" layihəsi həyata keçirilir, "Qubadlı" yarımstansiyası və müasir avtomobil yolları tikilib istifadəyə verilir:

"Dövlət başçısının xüsusi diqqət və nəzarəti ilə şəhərdə müasir infrastruktur yaradılır, sosial obyektlər inşa olunur, yeni yaşayış məhəllələri salınır.
Bütün bu layihələr bölgənin sosial-iqtisadi inkişafını təmin etməklə Qubadlını Şərqi Zəngəzur iqtisadi rayonunun mühüm mərkəzinə çevirir. Prezident İlham Əliyev və Birinci vitse-prezident Mehriban Əliyeva Qubadlıya dəfələrlə səfər edərək şəxsən bərpa və quruculuq işlərini izləyiblər. Qubadlı–Laçın və Qubadlı–Zəngilan magistral yolları regionun iqtisadi və sosial canlanmasında mühüm rol oynayır. Qubadlının azadlığı təkcə bir şəhərin deyil, bütövlükdə Zəngəzur istiqamətinin açarı idi. Prezident İlham Əliyevin 2023-cü il 31 iyul tarixli Sərəncamına əsasən, 25 oktyabr "Qubadlı şəhəri günü" kimi qeyd olunur. Bu qərar Qubadlının azadlığına, bərpasına və dirçəlişinə verilən yüksək dövlət dəyərinin bariz ifadəsidir. Qubadlı bu gün Zəngəzur dəhlizinin mühüm qovşağında yerləşməklə Azərbaycanın iqtisadi, logistik və strateji gücünün mərkəzinə çevrilməkdədir.
Nazirlər Kabinetinin 2025-ci il 9 sentyabr tarixli Qərarı ilə təsdiqlənmiş "Qubadlı şəhərinin 2040-cı ilədək inkişafına dair Baş plan" bu qədim diyarın müasir, dayanıqlı və yaşıl şəhər modeli kimi formalaşmasına möhkəm əsas yaradır.
Hər il Qubadlı şəhəri günü münasibətilə keçirilən tədbirlər, sərgilər və anım mərasimləri şəhərin zəngin tarixini gənc nəslə çatdırmaqla yanaşı, torpaqlarımızın azadlığı uğrunda canından keçən qəhrəmanların xatirəsini əziz tutur. Bu gün Qubadlı – azad, müasir və yenidən doğulan bir şəhər kimi Azərbaycanın qüdrətini, xalqımızın milli birliyini və qələbə əzmini təcəssüm etdirir".

Vüsalə İbrahimli

Telegramda izləyin