Antalyada Avstriyalı turist lift boşluğuna düşərək öldü

Antalyanın Alanya rayonunda tətil edən 80 yaşlı Avstriyalı turist V.S., qaldığı oteldə lift boşluğuna düşərək həyatını itirib.

Sonxeber.az türk mediasına istinadən xəbr verir ki, hadisə saat 11:00 radələrində Alanyanın Saray Mahallesi, Hacıhamdioğlu Caddesi üzərində yerləşən 4 mərtəbəli oteldə baş verib. Məlumata görə, Alanyaya tətilə gələn V.S., dördüncü mərtəbədən aşağı enmək istərkən hələ müəyyən edilməyən səbəbdən lift boşluğuna düşüb. Otel personalı bir neçə gündür V.S.-ni görmədiklərini bildirərək polisə xəbər verib.

Xəbərdarlıq əsasında hadisə yerinə polis, təcili tibbi yardım və xilasetmə qrupları göndərilib. Aparılan araşdırmada turistin 3 gün əvvəl lift boşluğuna düşdüyü müəyyən olunub.

İtfaiyə və tibbi heyətin köməyi ilə tapıldığı yerdən çıxarılan V.S.-nin həyatını itirdiyi təsdiqlənib. Cənazə hadisə yerindəki ilkin araşdırmadan sonra Alanya Tibb Ekspertizası və Patoloji Anatomiya İnstitutuna aparılıb.

Hadisə ilə bağlı araşdırma başlanıb.

Telegramda izləyin