Sərxoş şəxs məkana buraxılmadığı üçün atəş açdı: 3 nəfəri yaraladı - VİDEO

Bursanın Yıldırım rayonunda sərxoş olduğu üçün daxil olmaq istədiyi məkanın qapısından geri çevrilən şəxs əsəblərinə hakim ola bilməyərək havaya və ətrafa atəş açıb.

Sonxeber.az türk mediasına istinadən xəbər verir ki, hadisə axşam saatlarında Setbaşı məhəlləsində baş verib. Məlumata görə, adı hələ açıqlanmayan şübhəli şəxs içkili olduğuna görə məkana buraxılmayıb. Buna qəzəblənən şəxs belindəki silahı çıxararaq məkan istiqamətində ard-arda atəş açıb.

Güllələrdən bəziləri onun mübahisə etdiyi şəxsə, digərləri isə yaxınlıqdakı digər məkanda müştəri olan iki vətəndaşa dəyib. Yaralanan şəxslər qan içində yerə yıxılıb, ətrafda isə böyük həyəcan yaşanıb.

Hadisə yerinə çox sayda polis və təcili tibbi yardım əməkdaşları cəlb edilib. Yaralılar ilkin tibbi yardımdan sonra yaxınlıqdakı xəstəxanalara çatdırılıb. Onların həyatlarına təhlükə olmadığı bildirilir.

Atəş açan şəxs hadisə yerindən qaçıb. Polis onun tutulması üçün genişmiqyaslı axtarış aparır.

Hadisə anı ətrafdakı obyektlərdən birinin təhlükəsizlik kamerasına əks olunub. Olayla bağlı araşdırma davam edir.

Telegramda izləyin