Əynində imam paltarı, əlində içki şüşəsi olan gənc saxlanılıb

Partiyə "imam" geyimində alkoqollu dua edən gənc reaksiyalara səbəb oldu

Edirnə şəhərində bir əyləncə məkanında keçirilən maskalı partidə imam libası geyinərək əlində alkoqol şüşəsi ilə yağış duası edən şəxsin görüntüləri sosial şəbəkələrdə böyük narazılıq yaradıb.

Sonxeber.az türk mediasına istinadən xəbər verir ki, sosial mediada yayılan fotolardan sonra Diyanet-Sen hadisə ilə bağlı prokurorluğa şikayət edib və həmin gənc saxlanılıb. Hadisə ilə əlaqədar istintaq davam edir.

Hadisə 25 oktyabr şənbə günü şəhər mərkəzində yerləşən əyləncə məkanında baş verib. Partiyə qatılan gənclər müxtəlif kostyumlar geyinərək əylənib və çəkdikləri fotoları sosial şəbəkələrdə paylaşıblar.

Ancaq paylaşılan fotolardan birində bir şəxsin imam cübbəsi geyinib əlində alkoqol şüşəsi tutaraq yağış duası etdiyi anların əks olunması böyük etirazlara səbəb olub. Edirnə Diyanet-Sen bu hərəkəti dini dəyərlərin alçaldılması kimi qiymətləndirərək Cumhuriyyət Baş Prokurorluğuna müraciət edib.

Edirnə İl Polis İdarəsinin araşdırması nəticəsində görüntülərdəki şəxsin Feyzi T.T. olduğu müəyyən edilib və o, prokurorun göstərişi ilə saxlanılıb. İfadəsi alındıqdan sonra sərbəst buraxılan Feyzi T.T. daha sonra yenidən prokurorluğa çağırılıb, lakin prosedurdan sonra bir daha sərbəst buraxılıb.

Hadisə ilə bağlı istintaq Türk Cəza Qanununun 216/3-cü maddəsi (Dini dəyərləri alçaltma) üzrə davam etdirilir.

Telegramda izləyin