Hərəkətdə olan maşının pəncərəsindən qışqırıb kömək istəyən qız gündəm oldu: Qaçırılma deyil, mübahisə imiş

İzmirin Konak rayonunun Yeşildere küçəsində dünən axşam saatlarında avtomobilin içərisindən eşidilən "İmdad" qışqırığı sosial şəbəkələrdə geniş yayılaraq narahatlıq yaradıb.

Sonxeber.az türk mediasına istinadən xəbər verir ki, görüntülərin paylaşılmasının ardından İzmir İl Polis İdarəsi hadisə ilə bağlı dərhal hərəkətə keçib.

Asayiş Şöbəsinin Quldurluqla Mübarizə Bürosu əməkdaşlarının apardığı araşdırmada avtomobilin 35 CRV 769 dövlət nömrə nişanlı olduğu və sürücüsünün 35 yaşlı H.D. olduğu müəyyən edilib. Polis qısa müddətdə avtomobili saxlayaraq araşdırmanı genişləndirib.

Məlum olub ki, "İmdad" deyə kömək istəyən 15 yaşlı A.S.P. avtomobildə xalası 22 yaşlı B.T. ilə birlikdə taksidə imiş. Avtomobildə yaşanan hadisənin xala ilə bacısı qızı arasında yaranan mübahisə səbəbindən baş verdiyi, qaçırılma və ya zorakılıq halının olmadığı təsdiqlənib.

Polis sürücü H.D.-yə qanunsuz sərnişin daşıdığı üçün 46 min 392 lirə məbləğində inzibati cərimə tətbiq edib və avtomobil 60 gün müddətinə bağlanıb. Qeyri-qanuni taksidən istifadə edən sərnişin B.T.-yə isə 3 min 84 lirə cərimə kəsilib.

Hadisə ilə bağlı hüquqi proses davam edir.

Telegramda izləyin