Elçiliyə gələn ailənin atəşfəşanlığı yanğına səbəb oldu: 8 nəfər dumandan zərər gördü - VİDEO

İstanbulun Beyoğlu rayonunda qız istəməyə gələn ailənin küçədə patlatdığı fişənglərdən biri binaya düşərək yanğına səbəb olub.

Sonxeber.az türk mediasına istinadən xəbər verir ki, yanğın saat 20:30 radələrində Beyoğlunun Çukur məhəlləsi, Mermer küçəsində baş verib.

Məlumata görə, qız istəmək üçün gələn şəxslər məhəllədə hərəkətdə hava fişənglərindən istifadə ediblər. Atılan fişənglərdən biri binanın üzərinə düşüb və yanğına səbəb olub.

Alov qısa müddətdə binanın içərisinə yayılıb və içəridə olan 4-ü uşaq olmaqla 8 nəfər tüstü arasında çıxılmaz vəziyyətdə qalıb. Ətrafa toplaşan sakinlər dərhal polis, təcili yardım və yanğınsöndürmə qruplarını çağırıb.

İlkin müdaxiləni isə bina sakinləri edib. Yanğınsöndürənlər hadisə yerinə çatdıqdan sonra binada qalan şəxsləri təhlükəsiz şəkildə çıxararaq təcili yardım qruplarına təhvil veriblər. Dumandan zəhərlənən şəxslər ilkin tibbi yardımdan sonra xəstəxanaya aparılıb.

Yanğın yanğınsöndürənlərin təxminən bir saatlıq müdaxiləsindən sonra digər binalara keçmədən söndürülüb.

Məhəllə sakini Yakup Akbaba hadisəni belə təsvir edib:
"Qız istəməyə gəlmişdilər, hava fişəyi patlatdılar. Fişənglərdən biri binaya dəydi. Evin yandığını görüb dərhal köməyə qaçdıq. 2 mənzildə qalanları çıxardıq. Üzümüzü bağlayıb yuxarı qalxdıq. Sonra yanğınsöndürənlər gəlib içəridə qalanları çıxardı."

Hadisə ilə bağlı araşdırma aparılır.

Telegramda izləyin