13 yaşlı uşaq sinif yoldaşını boynundan bıçaqlayıb - VİDEO

İstanbulun Beyoğlu rayonunda 13 yaşlı M.A sinif yoldaşı olan E.D. tərəfindən boynundan bıçaqlanıb.

Sonxeber.az türk mediasına istinadən xəbər verir ki, eyni məktəbdə təhsil alan M.A. ilə E.D. arasında mübahisə yaranıb. Dünən səhər E.D. evdən bıçaqla çıxaraq, küçədə avtomobillərin arasında M.A.-nı gözləyib. M.A. küçəyə daxil olduğu anda E.D. ona yaxınlaşıb və boyun nahiyəsindən bıçaqlayıb. Yaralı vəziyyətdə qaçaraq kömək istəyən M.A.-ya hadisə yerinə çağırılan təcili tibbi yardım tərəfindən ilkin yardım göstərilib və o, Şişli Okmeydanı Prof. Dr. Cemil Taşçıoğlu Şəhər Xəstəxanasına aparılıb.

M.A.-nın boynuna iki tikiş qoyulub və onun həyati təhlükəsinin olmadığı bildirilib. Müalicəsi tamamlanan M.A. xəstəxanadan evə buraxılıb.

Hadisədən sonra Beyoğlu polis qrupları şübhəli E.D.-ni qısa müddətdə saxlayaraq ifadə vermək üçün polis bölməsinə aparıblar. Ona qarşı "qəsdən xəsarət yetirmə" maddəsi üzrə hüquqi proses başladılıb və məhkəməyə çıxarılacağı gözlənilir. Hadisə anı təhlükəsizlik kamerası tərəfindən qeydə alınıb.

Bundan əlavə, E.D.-nin məktəbdə digər şagirdləri "Sabah məktəbdə qırğın olacaq" sözləri ilə hədələdiyi iddia edilir. M.A.-nın isə bu sözləri eşidərək E.D.-ni xəbərdar etdiyi və mübahisənin də buna görə başladığı bildirilir.

Telegramda izləyin