"Bu mənasız verilişlərin "reytinq"ini kim ölçür?"

"Verilişlərin reytinqini təyin edən "Marsa" adlı şirkət haqqında bir müddətdir araşdırma aparıram, amma təəssüf ki, heç bir dəqiq və açıq məlumat tapmaq mümkün deyil. Hamı efirdə yayımlanan səviyyəsiz, mənasız verilişlərdən şikayətlənir, amma bu verilişlərin "reytinq"ini kim və necə ölçür – heç kim bilmir. Heç kim bilmir ki, bu cihazlar hansı evlərdə quraşdırılıb, nəticələr necə toplanır və hansı meyarlarla "populyarlıq" müəyyən olunur".

Axşam.az xəbər verir ki, bu sözləri müğənni Nura Suri sosial şəbəkə hesabında yazıb. Sənətçi verilişlərin reytinqinin hesablanmasından söz açıb. O bildirib ki, reytinq süni formada edilir:

"Bütün telekanallar bu cədvəl əsasında sponsorlardan və reklamdan pul qazanır. Nəticədə, səviyyəsiz "reytinqli qonaq" çağırılır, zövq oxşayan və yaxud maarifləndirici verilişlər isə guya ki, reytinq toplamır. Bu, çox ciddi məsələdir. Əminəm ki, bu sistem tam şəffaf şəkildə araşdırılsa, burada da dövlətimizə və xalqımıza xəyanət edənlərin izi tapılacaq.

Araşdırmadan əldə etdiyim məlumatlar: Marsa MMC (tam adı Media Audience Research System of Azerbaijan) Azərbaycanda televiziya auditoriyasının ölçülməsi ilə məşğul olan yeganə şirkətdir. Şirkət Böyük Britaniyanın "Kantar Media" adlı beynəlxalq media araşdırma qurumu ilə əməkdaşlıq etdiyini bildirir. Rəsmi saytında texniki tərəfdaşlıqdan bəhs olunur, amma şirkətin kimə məxsus olduğu, təsisçiləri və payçıları barədə heç bir açıq məlumat yoxdur. Reytinq ölçmələrinin necə və hansı evlərdə aparıldığı, cihazların (PeopleMeter) hansı prinsiplərlə seçildiyi barədə də ictimaiyyətə məlumat verilmir".

Telegramda izləyin