Bakıda sabiq direktor azyaşlı qızının pornoqrafik görüntülərini yayıb - TƏFƏRRÜAT

Bakıda 2015-ci il təvəllüdlü qızı Günay Məmmədovanın pornoqrafik görüntülərini yayan 1968-ci il təvəllüdlü Nigar Məmmədovanın (ad-soyadlar şərtidir) məhkəmə prosesi başa çatıb.

Sonxeber.az "Teleqraf"a istinadən xəbər verir ki, cinayət işinə Bakı Ağır Cinayətlər Məhkəməsində baxılıb.

Məhkəmənin hökmünə əsasən, Nigar Məmmədova 5 il müddətinə azadlıqdan məhrum edilib. Bundan başqa, o, 2 il müddətinə təhsil və təlim-tərbiyə müəssisələrində inzibati vəzifə tutma və təlim-tərbiyə fəaliyyəti ilə məşğul olma hüququndan məhrum edilib.

Sanksiyanın təhsillə bağlı hissəsi ona görədir ki, N.Məmmədova Bakıda fəaliyyət göstərən uşaq bağçalarından birinin vaxtilə direktoru olub.

Cinayət işinə gəlincə, 57 yaşlı ana 2023-cü ildə yaşadığı evdə öz istifadəsində olan mobil telefonla porno saytlarından birinə daxil olub. O, 8 yaşı olan qızının görüntülərini çəkib və uşaq pornoqrafiyasına aid videoları həmin sayta yükləyib.

Təqsirləndirilən şəxs ifadəsində bunun səhvən olduğunu, telefonda qəfil hansısa proqramın açıldığını bildirsə də, bu, məhkəmə heyəti üçün inandırıcı olmayıb.

Məhkəmədə azyaşlının atası da ifadə verib, o, buna inanmaq istəmədiyini qeyd edib. Günayın atası Nigar Məmmədovadan 2018-ci ildə rəsmi şəkildə boşandığını bildirib.

Qeyd edək ki, N.Məmmədova həm də analıq hüququndan məhrum edilib. Bununla bağlı ayrıca məhkəmə qətnaməsi var.

Telegramda izləyin