12 ildir ölü sayılan şəxs, dağda kamp edərkən tapıldı

Bolqarıstanın cənub-qərbində yerləşən Pirin Dağında aparılan rutin nəzarət zamanı icazəsiz düşərgə quran bir kişi aşkarlanıb.

Sonxeber.az xarici mediaya istinadən xəbər verir ki, Milli Park əməkdaşları şəxsiyyət yoxlaması aparmaq istədikdə həmin şəxs aqressiv davrandığı üçün əraziyə polis çağırılıb.

Polis müdaxiləsindən sonra kimlik sənədləri olmayan şəxs Bansko Rayon Polis İdarəsinə aparılıb. Aparılan araşdırma nəticəsində məlum olub ki, həmin şəxs 2008-ci ildə həm ölkə daxilində, həm də beynəlxalq səviyyədə axtarışa verilib və 2013-cü ildə tapılmadığı üçün məhkəmə tərəfindən rəsmi şəkildə ölü elan edilib.

Pirin Milli Parkının müdiri Rosen Banenski məsələ ilə bağlı açıqlamasında bildirib:
"Görünən odur ki, Rusçuklu olduğu müəyyən edilən bu şəxs illərdir dağda tənha şəkildə yaşayırmış. Park işçilərinin sayəsində kimliyi artıq dəqiqləşdirilib"

Yunanıstan və Şimali Makedoniya sərhədlərinə yaxın yerləşən Pirin Dağları 2914 metr hündürlüyü ilə Bolqarıstanın ikinci ən yüksək zirvəsinə sahibdir. Təxminən 40 min hektarlıq ərazini əhatə edən Pirin Milli Parkı 1983-cü ildə UNESCO Dünya İrsi Siyahısına daxil edilib. Buzlaq gölləri, şəlalələr və ardıc meşələri ilə tanınan park, eyni zamanda ayı və canavar kimi vəhşi heyvanların yaşayış məskənidir.

Telegramda izləyin