Həbsxanadan çıxdıqdan sonra qadını qətlə yetirdi, ardınca intihar etdi - VİDEO

Erzurumda baş verən dəhşətli hadisə şəhərdə böyük sarsıntı yaradıb.

Sonxeber.az türk mediasına istinadən xəbər verir ki, 22 oktyabrda həbsxanadan azad olunan Salih Aybas, səhər saatlarında bir müddətdir izlədiyi Nermin Tirit’i küçənin ortasında silahla vuraraq öldürüb. Daha sonra isə eyni silahla özünə atəş açaraq həyatına son verib.

Hadisə Yakutiye rayonunun Ömər Nasuhi Bilmen məhəlləsində baş verib. Məlumata görə, Salih Aybas Nermin Tirit’i küçədə qovmağa başlayıb. Tirit yaşadığı binanın həyətinə sığınmaq istəyərkən Aybas tərəfindən güllələnib. Qadın hadisə yerində həyatını itirib.

Məlumat üzərinə əraziyə polis və təcili tibbi yardım qrupları cəlb olunub. Aparılan ilkin yoxlamada həm Nermin Tirit’in, həm də Salih Aybas’ın həyatını itirdiyi müəyyən edilib. Erzurum Polis İdarəsinin rəisi Onur Karaburun hadisə yerinə gələrək araşdırmalara rəhbərlik edib.

Məlum olub ki, Nermin Tirit Erzurum Texniki Universitetində təmizlik işçisi kimi çalışırmış. Salih Aybas isə 2023-cü ildə Tiritə qarşı şiddət, təhdid və qəsdən adam öldürməyə cəhd ittihamları ilə həbs edilmiş və təxminən iki il cəza çəkdikdən sonra yalnız 10 gün əvvəl – 22 oktyabrda – azadlığa buraxılmışdı.

Hər iki şəxsin cəsədi tibbi ekspertiza üçün Erzurum Məhkəmə-Tibbi İdarəsinin morquna aparılıb.

Hadisə ilə bağlı prokurorluq tərəfindən araşdırma başladılıb.

Telegramda izləyin