Universitetdə qadın ayaqyolunun qarşısında asılan yazı müzakirələrə səbəb oldu

Marmara Universitetində qadınlar üçün nəzərdə tutulmuş bəzi tualetlərin qapılarına "Hanım WC" yazılı yeni lövhələrin asılması diqqət çəkib.

Sonxeber.az türk mediasına istinadən xəbər verir ki, universitet daxilində aparılan bu dəyişiklik qısa müddət ərzində sosial şəbəkələrdə geniş müzakirələrə səbəb olub.

Yeni lövhələrdə "Qadın WC" ifadəsi əvəzinə "Xanım WC" yazılması bəziləri tərəfindən "daha nəzakətli və klassik bir ifadə seçimi" kimi qarşılanarkən, bir qrup istifadəçi bunu "gərəksiz dil müdaxiləsi" və ya "cinsiyyət rollarını ön plana çıxarmaq" kimi tənqid edib.

Sosial media platformalarında mövzu ilə bağlı müxtəlif şərhlər yazılıb. Bəzi istifadəçilər lövhələrin estetik olaraq daha uyğun göründüyünü qeyd edərək tətbiqi dəstəkləyib. Digər bir qrup isə universitet kimi elm mühitində belə terminoloji dəyişikliklərin müzakirəsiz tətbiq edilməsini doğru hesab etmədiklərini bildirib.

Hazırda Universitet rəhbərliyi tərəfindən mövzu ilə bağlı rəsmi bir açıqlama verilməyib. Yeni lövhələrin nə üçün və hansı qərarla dəyişdirildiyi bilinmir.

Telegramda izləyin