Yatmış ərinin üzərinə qızğın yağ tökərək öldürdü

Türkiyədə iki uşaq anası olan 44 yaşlı qadın, mübahisə etdiyi ərini yuxuda olarkən üzərinə qızğın yağ tökərək yandırdı.

Sonxeber.az türk mediasına istinadən xəbər verir ki, iddiaya görə, Zeynəb G. (44) ilə 53 yaşlı əri Sinan G. arasında mübahisə düşüb. Bir müddət sonra Sinan G. yataq otağına keçərək yatıb. Zeynəb G. isə mətbəxdə qızdırdığı yağı götürərək yuxuda olan ərinin üstünə töküb.

Ağır yanıq xəsarətləri alan Sinan G.-nin qışqırıqları evdəki uşaqları oyadıb. Hadisə barədə polis və təcili tibbi yardım əməkdaşlarına məlumat verilib. Bədəninin böyük hissəsində ciddi yanıq olan kişi xəstəxanaya aparılıb. 13 gün boyunca həkimlərin bütün səylərinə baxmayaraq həyatını itirib.

Hadisədən sonra polis Zeynəb G.-ni saxlayıb. O, istintaqa verdiyi ifadəsində ərinin uzun müddətdir spirtli içki içdiyini və ona şiddət tətbiq etdiyini bildirib. Qadın məhkəmə qərarı ilə həbs edilərək cəzaçəkmə müəssisəsinə göndərilib. Hadisə ilə bağlı istintaq davam edir.

Hadisənin baş verdiyi küçədə işləyən və mərhum Sinan G.-nin qonşusu olan Serhat Nalbantoğlu bildirib:

"Qonşumuz idi, çox sevdiyimiz bir insan idi, Allah rəhmət eləsin. Hələ də hadisənin şokundayıq. Biz həm qonşu, həm də həmkar idik. Yeməyimizi birlikdə yeyirdik, işlərimizi bölüşürdük. Çox yaxşı, çevrəsi tərəfindən sevilən bir insan idi. Çox kədərləndik. Heç bir insan belə bir şəkildə cəzalandırıla bilməz".

Telegramda izləyin