Meşəyə odun yığmağa gedən yaşlı cütlüyün meyitləri tapılıb

Denizlinin Pamukkale rayonunda odun toplamaq üçün meşəyə gedən yaşlı cütlükdən iki gün xəbər alınmayıb.

Sonxeber.az türk mediasına istinadən xəbər verir ki, onların axtarışına başlayan yaxınları cütlüyü aşan traktorun altında cansız halda tapıb.

Hadisə Güzelpınar məhəlləsində baş verib. Məlumata görə, 62 yaşlı Hasan Çelik və 63 yaşlı həyat yoldaşı Ayşe Çelik, 5 noyabr çərşənbə günü Orman Baş İdarəsi tərəfindən toplanmasına icazə verilmiş budanmış odunları toplamaq üçün meşəlik əraziyə yollanıblar.

Şəhərdə yaşayan övladları iki gün boyunca valideynləri ilə əlaqə yarada bilmədikdə məhəllə muxtarı ilə əlaqə saxlayıb. Muxtar cütlüyün evinə baxış keçirərkən traktorun da evdə olmadığını görüb və digər sakinlərlə birlikdə meşədə axtarış aparmağa başlayıb.

Axtarış zamanı Hasan və Ayşe Çelik aşan traktorun altında hərəkətsiz vəziyyətdə tapılıb və dərhal 112-yə məlumat verilib. Hadisə yerinə gələn təcili yardım qrupları cütlüyün artıq həyatını itirdiyini müəyyən edib.

Jandarma tərəfindən aparılan ilkin araşdırmaya əsasən, traktorun meşə yolundakı yamacı qalxarkən güc itirməsi səbəbindən aşdığı ehtimal olunur.

Cütlüyün cansız bədənləri yanğınsöndürənlər tərəfindən çıxarılaraq Məhkəmə-Tibbi Ekspertiza İdarəsinə göndərilib.

Hadisə ilə bağlı istintaq davam edir.

Telegramda izləyin