Villada iki gəncin müəmmalı ölümü – Filistinli dostlar hərəkətsiz vəziyyətdə tapıldı

Türkiyənin Sakarya vilayətinin Sapanca rayonunda baş verən müəmmalı hadisə diqqətləri cəlb edib.

Sonxeber.az türk mediasına istinadən xəbər verir ki, Rüstempaşa məhəlləsində, İpekyolu küçəsində yerləşən bir yaşayış kompleksində qalan Filistin əsilli 4 dostdan ikisi – 22 yaşlı Yousef Zoabi və 27 yaşlı Samir Şahvan – səhər saatlarında otaqlarında hərəkətsiz vəziyyətdə tapılıb.

Hadisə barədə dərhal təcili tibbi yardım və polis qruplarına məlumat verilib. Sağlıq əməkdaşlarının hadisə yerindəki ilkin müdaxilələrinə baxmayaraq, gənclərdən hər ikisi Sapanca İlçe Xəstəxanası və Sadıka Sabancı Dövlət Xəstəxanasına aparıldıqdan sonra həyatını itirib.

İlkin araşdırmada onların bədənlərində hər hansı kəsici və ya deşici alət izinə rast gəlinməyib. Gənclərin dəqiq ölüm səbəbi aparılacaq tibbi ekspertizadan sonra müəyyən ediləcək.

Hadisə ilə bağlı polis genişmiqyaslı araşdırmaya başlayıb. Hazırda istintaq çərçivəsində zəhərlənmə ehtimalı da daxil olmaqla bütün versiyalar nəzərdən keçirilir.

Telegramda izləyin