Odun toplamaq üçün meşəyə gedən yaşlı cütlüyün cansız bədənləri 2 gün sonra tapıldı

Türkiyədə meşədən odun toplamağa gedən ər-arvad iki gün ərzində evlərinə qayıtmayınca axtarışa çıxan oğulları acı xəbər aldı. Yaşlı cütlüyün meşədə aşmış traktorun altında qaldıqları müəyyənləşib.

Sonxeber.az türk mediasına istinadən xəbər verir ki, hadisə Türkiyənin Denizli vilayətinin Pamukkale rayonuna bağlı Güzelpınar məhəlləsində baş verib. Əldə edilən məlumata görə, Hasan Çelik (62) və həyat yoldaşı Ayşe Çelik (63) 5 noyabr çərşənbə günü Orman İdarəsi tərəfindən yığılmasına icazə verilən budanmış və istifadəsiz qalmış odunları toplamaq üçün meşəyə gediblər.

Cütlüyün şəhərdə yaşayan oğlu iki gün ərzində valideynlərindən xəbər ala bilmədikdə, məhəllə muxtarına müraciət edib. Evə baxış keçirən muxtar traktorun da yerində olmadığını görərək kənd sakinləri ilə birgə meşəlik ərazidə axtarışlara başlayıb.

Axtarış zamanı kəndlilər Hasan və Ayşe Çelik cütlüyünü aşmış traktorun altında hərəkətsiz vəziyyətdə tapıblar və dərhal 112 Təcili Çağrı Mərkəzinə məlumat veriblər.

Hadisə yerinə təcili tibbi yardım, jandarma qrupları cəlb olunub. Tibbi yardım əməkdaşlarının yoxlaması nəticəsində yaşlı cütlüyün həyatını itirdiyi müəyyən edilib.

Jandarmanın ilkin araşdırmasına əsasən, Hasan Çelik idarə etdiyi 20 DL 669 nömrə nişanlı traktorla dar və maili yolda hərəkət edərkən nəqliyyat vasitəsinin rampanı aşa bilməyib və traktor aşıb.

Cütlüyün meyitləri xilasetmə qrupları tərəfindən traktorun altından çıxarılıb və tibbi ekspertiza üçün Denizli Ədli Tibb Qrupunun morquna göndərilib. Hadisə ilə bağlı istintaq başlanıb.

Telegramda izləyin