16 yaşlı yeniyetmə sünnət toyunda güllələnərək öldürüldü - VİDEO

Şanlıurfanın Karaköprü rayonunda park yeri üstündə yaranan mübahisə faciə ilə nəticələnib.

Sonxeber.az türk mediasına istinadən xəbər verir ki, hadisə Seyrantepe məhəlləsində axşam saatlarında baş verib.

Məlumata görə, küçədə keçirilən sünnət mərasimində insanlar musiqi sədaları altında əylənərkən, həmin binada yaşayan Mehmet E. adlı şəxs evinə gələndə avtomobilini park edə bilməyib. Bu səbəbdən mərasim sahibləri ilə mübahisə yaranıb.

İddialara görə, əsəblərinə hakim ola bilməyən Mehmet E. ov tüfəngi ilə kütləyə atəş açıb. Nəticədə 5-i uşaq olmaqla 7 nəfər yaralanıb. Yaralılar təcili tibbi yardım maşınları ilə xəstəxanaya aparılıb.

Lakin yaralılardan biri – 16 yaşlı İklimya Subay, həkimlərin bütün səylərinə baxmayaraq, xilas edilə bilməyib.

Hadisə ilə bağlı istintaq başladılıb, şübhəlinin saxlanılması istiqamətində əməliyyatlar davam edir.

Telegramda izləyin