"Qız istəmə" üstündə dava: bir qadın öldü, uşaq yaralandı - VİDEO

Türkiyənin Diyarbakır vilayətində "qız istəmə" məsələsinə görə çıxan dava faciə ilə nəticələnib.

Sonxeber.az türk mediasına istinadən xəbər verir ki, hadisə zamanı 22 yaşlı İsmet Barçin silahlı hücumda həyatını itirib, 10 yaşlı J.B. isə ağır yaralanıb.

Məlumata görə, Kayapınar rayonunun Güleçoba kəndində eyni ailənin üzvləri arasında "qız istəmə" səbəbindən mübahisə yaranıb. Dünən axşam saatlarında baş verən davada tərəflər bir-birinə təpik, yumruq və dəyənəklə hücum ediblər. Nəticədə iki nəfər xəsarət alıb. Hadisədən sonra jandarma tərəfindən saxlanılan dörd şübhəli bu gün məhkəmə qərarı ilə həbs edilərək cəzaçəkmə müəssisəsinə göndərilib.

Bunun ardınca, bu gün günorta saatlarında tərəflərdən birinin evinə avtomat və tapançalardan atəş açılıb. Namaz qıldığı vaxt güllə yarası alan İsmet Barçin hadisə yerində dünyasını dəyişib, onun 10 yaşlı qardaşı oğlu isə yaralanıb. Yaralı uşaq xəstəxanaya yerləşdirilib, onun həyatının təhlükədə olduğu bildirilib.

Jandarma Suç Araşdırma Timi (JASAT) hadisə ilə bağlı əməliyyat keçirərək 14 nəfəri saxlayıb. Axtarışlar zamanı 3 avtomobildən bir tapança, bir ov tüfəngi və çox sayda güllə aşkarlanıb. Saxlanılan şəxslərin istintaqı davam edir.

Telegramda izləyin