Dəhşətli ailə faciəsi: polis zabiti arvadını və iki qızını qətlə yetirdi - VİDEO

Antalyada illik məzuniyyətdə olan polis əməkdaşı ailə mübahisəsi zəminində dəhşətli qətl törədib.

Sonxeber.az türk mediasına istinadən xəbər verir ki, M.G. adlı polis, həyat yoldaşı və iki qızını xidməti tapançası ilə güllələyərək öldürüb, daha sonra özü hadisə barədə polisə məlumat verib.

Hadisə saat 17:00 radələrində Kepez rayonunun Varsak Demirel məhəlləsində yerləşən iki mərtəbəli evdə baş verib. Antalya Polis İdarəsinin Varsak Polis Mərkəzində xidmət edən M.G., əvvəlcə evin salonunda həyat yoldaşı Fatma Gıyarı (31), daha sonra 10 yaşlı qızı Meral Ebrar Gıyarı və 4 yaşlı Merve Gıyarı atəş açaraq qətlə yetirib.

Silah səslərini eşidən qonşuların məlumatı əsasında hadisə yerinə çox sayda polis və təcili yardım əməkdaşı cəlb edilib. Aparılan araşdırma nəticəsində ana və iki qızının hadisə yerində həyatını itirdiyi müəyyən olunub. Cinayəti törədən M.G. isə hadisədən dərhal sonra həmkarları tərəfindən saxlanılıb.

Prokurorluq və hadisə yeri ekspertlərinin araşdırmasından sonra qadın və uşaqların meyitləri Antalya Məhkəmə-Tibbi Ekspertiza İnstitutunun morquna aparılıb. Məlum olub ki, polis əməkdaşı M.G. hadisə zamanı illik məzuniyyətdə olub.

Hadisə yerinə gələn mərhum Fatma Gıyarın bacısı sinir krizi keçirib və yaxınları tərəfindən çətinliklə sakitləşdirilib.

İlkin məlumatlara görə, faciə cütlük arasında "xəyanət" iddiası üzündən yaranan mübahisə zamanı baş verib. Fatma Gıyarın ərinə uşaqlarının yanında təhqirlər etdiyi və onu vurduğu, bundan sonra isə polis zabitinin əsəblərinə hakim ola bilməyərək əvvəl həyat yoldaşını, sonra isə iki qızını güllələdiyi bildirilir. Qətli törətdikdən sonra M.G.-nin 112 Təcili Çağrı Mərkəzinə zəng edərək hadisəni etiraf etdiyi qeyd olunur.

Telegramda izləyin