"Ağdam Zəfəri tarixi ədalətin, siyasi iradənin və milli birliyin ən parlaq nümunəsidir" - DEPUTAT

"Ağdam Zəfəri tarixi ədalətin, siyasi iradənin və milli birliyin ən parlaq nümunəsidir" - , bunu Sonxeber.az -a açıqlama verən deputat Günay Ağamalı deyib:

"2020 - ci ilin payızında Azərbaycan tarixinin ən şanlı səhifələrindən biri yazıldı. Xalqımızın illərdir gözlədiyi an nəhayət ki, zəfərlə taclandı. 44 günlük şanlı zəfər yolu Azərbaycan əsgərinin gücünü, prezident-xal-ordu birliyinin sarsılmazlığını bütün dünyaya nümayiş etdirdi.
Ermənistan Respublikasının İkinci Qarabağ müharibəsində məğlubiyyətin nəticəsi olaraq kapituliyasiya aktına imza atması tarixi qələbəmizin rəsmi təsdiqi, eyni zamanda 30 illik ədalətsizliyə son qoyan qətiyyətli addım və milli iradənin təntənəsi idi. Möhtərəm Cənab Prezident İlham Əliyevin apardığı prinsipal, qətiyyətli diplomatik fəaliyyət, Silahlı Qüvvələrimizin əldə etdiyi ardıcıl qələbələr İrəvan hakimiyyətini məcbur etdi ki, məğlubiyyəti qəbul etsin. Döyüş meydanında qazanılan qələbəni danışıqlar müstəvisinə uğurla transformasiya edən Azərbaycan diplomatiyası Ağdam, Kəlbəcər, Laçın rayonlarını danışıqlar yolu ilə işğaldan azad etdi. Bu tarixi nailiyyətin mərkəzində heç şübhəsiz ki, cənab Prezident İlham Əliyevin müdrik liderliyi və prinsipal siyasəti dayanır. Məhz bu səbəbdən 20 Noyabr Ağdam rayonunun danışıqlar yolu ilə geri qaytarılması Azərbaycan dövlətçiliyi tarixində mühim siyasi qələbə və diplomatiyamızın ən parlaq nümunələrindən biridir.

Hələ SSRİ dövründə özünün geniş iqtisadi potensialı ilə diqqət çəkən Ağdam rayonu Cənubi Qafqazın ən böyük yaşayış məskənlərindən biri sayılırdı. Buna baxmayaraq, Qarabağda başlayan işğal prosesi Ağdamdan da yan keçmədi. Ağdam uğrunda 42 gün davam edən döyüş 1993-cü il 23 iyul tarixində Ağdam ərazisinin 73 faizinin işğalı ilə bitdi.

Ərazisi 1094 kvadrat kilometr olan Ağdamın 882 kvadrat kilometri, rayon mərkəzi ilə birgə 90 kəndi işğal olunmuş, işğal nəticəsində 128 min insan məcburi köçkün həyatını yaşamağa məcbur olub. İşğal nəticəsində Ağdam rayonunun 38 kolxozu, 12 sənaye obyekti, 74 məktəbi, 271 mədəniyyət evi, bütün dünyada yeganə olan Çörək muzeyi, 67 idarə və 99 klubu düşmən əlinə keçmişdir. Ağdam uğrunda gedən döyüşlər zamanı 6 mindən artıq insan şəhid olmuş, minlərlə insan yaralanmış, əhali öz doğma ev-eşiyindən qovularaq məcburi köçkün kimi Azərbaycanın 59 rayonunun 875 yaşayış məntəqəsində məskunlaşmışdır.

BMT Təhlükəsizlik Şurasının 853 saylı qətnaməsimə məhəl qoymayan Ermənistan 30 ilə yaxın Ağdamda bütün infrastrukturu dağıtmış, şəhəri xarabalığa çevirmişdir. Erməni işğalı nəticəsində Qafqazın Xirosiması adlandırılan Ağdam rayonunun azad edilməsindən sonra dirçəldilməsi prosesi xalqımız qarşısında dayan yeni bir missiyadır. Bu gün cənab Prezident İlham Əliyevin rəhbərliyi ilə Ağdamda genişmiqyaslı bərpa və quruculuq işləri həyata keçirilir. Yeni yollar salınır, elektrik, su və qaz xəttləri çəkilir, tarixi-mədəni irs bərpa edilir və ən son standartlara uyğun yaşayış məntəqələri tikilir. Bütün bunlar dövlətimizin iqtisadi və siyasi gücünün əyani sübutdur. Məhz bu səbəbdən Ağdam Zəfəri Azərbaycan xalqının birlik ruhunun, milli qürurunun, dövlətinə, Ali Baş Komandanına olan sonsuz inamının göstəricisidir. Bu qələbə onu sübut etdi ki, güclü siyasi liderlik, nizami ordu və xalq-dövlət birliyi olduğu zaman heç bir ədalətsizlik əbədi qala bilməz".

Telegramda izləyin