Rusiyada müəllimin şagirdini stul ilə vurması qalmaqal yaratdı – "Zarafat edirdim" müdafiəsi etiraz doğurdu - VİDEO

Rusiyanın Artyom şəhərində fəaliyyət göstərən bir məktəbdə çalışan riyaziyyat müəllimi sinifdə şagirdlərinə zor tətbiq edərkən təhlükəsizlik kameralarına düşüb. Görüntülər sosial mediada yayıldıqdan sonra valideynlər ayağa qalxıb.

Sonxeber.az xarici mediaya istinadən xəbər verir ki, paylaşılan videolarda müəllimin bəzi şagirdlərin ağzını yapışqan lentlə bağladığı, bir oğlan şagirdə isə stulun ayağı ilə vurduğu açıq şəkildə görünür. Hadisə xüsusilə analar arasında böyük qəzəb yaradıb.

Bir ana yaşananlara etiraz edərək belə deyib: "Bunu normal hesab etməliyik? Bu ilk deyil, iki gün əvvəl də oxşar hadisə baş verdi". Başqa bir valideyn isə: "Şokdayam, həqiqətən şokdayam" sözləri ilə reaksiyasını bildirib.

Qalmaqallı görüntülərə baxmayaraq müəllim və məktəb rəhbərliyi vəziyyəti kiçiltməyə çalışıb. Müəllim etdiyi hərəkətlərin "zarafat məqsədli" olduğunu və "yaramazlıq edən şagirdləri cəzalandırmaq üçün oyun oynadığını" iddia edib.

Valideynlər isə bunun tam yalan olduğunu və müəllimin uzun müddətdir şagirdlərə fiziki zorakılıq göstərdiyini bildiriblər:

"Uşaqlar daim başlarına vurulduğunu və ağızlarının bantlandığını deyirdi, amma sübut olmadığı üçün heç kim tədbir görə bilmirdi. Kamera görüntüləri ortaya çıxıdıqda məcbur dayandı".

Primorsk diyarı prokurorluğu müəllim haqqında "uyğun olmayan davranış" səbəbi ilə araşdırma başladıldığını açıqlayıb.

Uşaq ombudsmanı Olqa Romanova isə valideynləri hədəfə alaraq sinif kamerası görüntülərini paylaşmağın "uşaqların şəxsi məlumatlarının pozulması" olduğunu deyib. Bu açıqlama valideynlərin qəzəbini daha da artırıb.

Rəsmi şəxslər isə müəllimi müdafiə edərək onun "hörmət edilən bir pedaqoq" olduğunu iddia edib.

Telegramda izləyin