Taylandda ölü hesab edilən yaşlı qadın kremasiya üçün aparılarkən dirildi - VİDEO

Taylandda inanılmaz hadisə baş verib. Ailəsi tərəfindən ölü elan edilən 65 yaşlı Chonthirot adlı qadın, tabutda kremasiya məkanına aparıldığı vaxt qəfil oyanaraq tabutun qapağına vurmağa başlayıb.

Sonxeber.az xarici mediaya istinadən xəbər verir ki, hadisə noyabrın 23-də Phitsanulok şəhərində baş verib. Ailəsi onun evdə sakit şəkildə öldüyünü düşünərək cəsədi ağ tabuta yerləşdirib və Bangkokun kənarında aztəminatlı ailələr üçün pulsuz kremasiya xidməti göstərən bir məbədə doğru dörd saatlıq yola çıxıb.

Lakin məbədə çatmamış, tabutun içindən hərəkət və döyüntü səsləri eşidilib. Görüntülərdə Chonthirot-un tabutun içində tərpəndiyi və üzündəki milçəkləri qovduğu görünür. Ailəsi isə şok içində bu anları izləyib.

Qadının qardaşı, 57 yaşlı Mongkol, bacısının iki ildir yataq xəstəsi olduğunu və səhər saat 2-də ölmüş kimi göründüyünü bildirib. Hətta onun ölümünü təsdiqləyən sənədləri imzalayıb rahibə təhvil verdiyini deyib. O, həmin anları belə təsvir edib:
"Həm çaşmışdım, həm də sevinmişdim, çünki bacım hələ də yaşayırdı. Demək olar ki, şokdan yıxılacaqdım. Onun dirilməsi möcüzə idi".

Məbəd işçisi 27 yaşlı Thammanoon isə tabutu kremasiya salonuna aparmağa hazırlaşarkən içəridən zəif döyüntü və yardım səsi eşitdiyini bildirib:
"Örtüyü qaldıranda onun tərpəndiyini görəndə donub qaldım. Şüuru açıq idi, zəif nəfəs alırdı və başını tərpədirdi, amma danışa bilmirdi. Belə bir hadisə ilə ilk dəfə qarşılaşırdım".

Hadisədən sonra Chonthirot təcili yardım maşını ilə Bang Yai Xəstəxanasına aparılıb. Məbəd rəhbərliyi qadının müalicə xərclərini qarşılayacağını bildirib.

Telegramda izləyin