Ölmüş anasının meyitini gizlətdi, özünü ona oxşadıb üç il pensiyasını aldı

İtaliyanın Mantua şəhəri yaxınlığındakı Borgo Virgilio qəsəbəsində yaşayan 56 yaşlı bir kişi üç il əvvəl vəfat etmiş anasının ölümünü gizlədərək onun pensiyasını almaqda ittiham olunur.

Sonxeber.az türk mediasına istinadən xəbər verir ki, həmin şəxs 2022-ci ildə vəfat edən anasının yerinə keçib onun pensiya ödənişlərini almağa davam edib. Hətta kimliyinin yenilənməsi zamanı belə anasının obrazını canlandırmağa çalışıb.

Kişinin bələdiyədə kimlik yeniləmə proseduru üçün müraciət edərkən anasına bənzəmək məqsədilə tünd rəngli parik taxdığı, makiyaj etdiyi, köhnə tərzdə qadın geyimləri və zinyət əşyaları ilə özünü "yaşlı qadın" kimi göstərməyə çalışdığı bildirilib. O, yaşlı qadın kimi yeriş etməyə cəhd göstərsə də, davranışları əməkdaşların şübhəsini çəkib. İşçilər onun üz cizgilərinin yaşlı qadına uyğun gəlmədiyini və boynunun "həddindən artıq qalın" olduğunu görərək məsələni rəhbərliyə çatdırıblar.

Bələdiyə əməkdaşlarının xəbərdarlığından sonra təqdim olunan foto ilə arxivdəki orijinal kimlik görüntüləri müqayisə edilib və polis işə qarışıb. Kişinin evində aparılan axtarış zamanı isə ananın cəsədi təmizlik otağında gizlədilmiş vəziyyətdə tapılıb. Bununla da dələduzluq şübhəsinin arxasındakı dəhşətli həqiqət üzə çıxıb.

Borgo Virgilio bələdiyyə sədri Francesco Aporti, həmin şəxsin binaya "dodaq boyası, dırnaq boyası, köhnə tərz sırğalar və tünd rəng pariklə daxil olduğunu" deyib. Onun qadın səsini imitasiya etməyə çalışdığı, lakin bəzi anlarda səsinin kişi tonuna keçdiyi də qeyd olunub.

İtalyan mediasının məlumatına görə, şübhəli işsiz tibb işçisi olub və anasının pensiyası ilə ailəyə məxsus üç əmlakdan gələn gəlirlər hesabına illik təxminən 53 min avro qazanc əldə edib.

Telegramda izləyin