Qonşunun pitbull iti iki azyaşlını görün nə hala saldı! - VIDEO

Ankaranın Etimesqut rayonunda bazarlıqdan evə qayıdan Öztürk ailəsinin 1,5 və 5 yaşlı övladları qonşularına məxsus pitbull cinsi itinin hücumuna məruz qalıb.

Sonxeber.az türk mediasına istinadən xəbər verir ki, hadisə günorta saatlarında baş verib. Ailə liftlə yaşadıqları mərtəbəyə qalxdığı zaman qarşı qonşunun pitbull cinsi iti qapıdan çıxaraq birbaşa uşaqlara hücum edib. 1,5 yaşlı Efe və 5 yaşlı bacısı Doğa Öztürk dərhal təcili tibbi yardım maşını ilə Bilkənt Şəhər Xəstəxanasına aparılıb. Uşaqların reanimasiya şöbəsində nəzarətdə saxlanıldığı, həyatlarına təhlükə olmadığı bildirilib.

Hadisə haqqında danışan ata Adem Öztürk, mənzillərinə qalxdıqları an itlə üz-üzə gəldiklərini deyib:
"İt qızımın sinəsinə, oğlumun isə üzünə hücum etdi. Mən onu gördükcə nəfəs ala bilmirəm. Çox ağır bir mənzərə idi," – deyə o bildirib.

Ata həmçinin qeyd edib ki, binada yaşayan bir çox sakin əvvəllər də itdən şikayət etsə də, nəticə olmayıb:
"Artıq buna müdaxilə edilməlidir. Mən bu insanların cəzalandırılmasını istəyirəm. 1,5 yaşlı övladımın üzünə baxa bilmirəm. Lütfən səsimi eşidin," – deyə o əlavə edib.

Öztürk ailəsi məsul şəxslərin cəzalandırılmasını tələb edir. Hadisə ilə bağlı araşdırma aparılır.

Telegramda izləyin