90 yaşlı sürücü son sürətlə sürdüyü avtomobillə kafeyə girdi!

Kaliforniyanın Los Gatos bölgəsində 90 yaşlı bir sürücünün idarəetməni itirərək avtomobili ilə bir kafeyə girməsi böyük təşvişə səbəb olub.

Sonxeber.az türk mediasına istinadən xəbər verir ki, hadisə Los Gatos-un University Avenue küçəsində yerləşən "Los Gatos Coffee Roasting Company" adlı məşhur kafenin qarşısında baş verib. Yerli WABC-TV News tərəfindən yayımlanan görüntülərdə avtomobilin yüksək sürətlə irəlilədiyi və birbaşa kafeyə çırpıldığı görünür. Zərbənin gücündən kafedə böyük dağıntı yaranıb. Kimliyi açıqlanmayan yaşlı sürücü xəstəxanaya yerləşdirilib.

Kafenin sahibi Teri Hope hadisədən böyük üzüntü duyduğunu bildirərək, içəridə heç kimin olmamasının böyük şans olduğunu deyib:
"Mənzərə çox dəhşətlidir, amma içəridə müştəri və ya işçi olmaması inanılmaz bir xoşbəxtlikdir," – deyə o bildirib.

Hadisə yerindən çəkilən fotolarda qaranlıq rəngli sedanın şüşəni qıraraq kafenin içərisinə qədər daxil olduğu və dağıntılar arasında qaldığı görünür.

Los Gatos Polis Departamentinin açıqlamasına görə, qəzaya alkoqolun təsirinin səbəb olmuş ola biləcəyi ehtimal edilir, ancaq araşdırma çoxşaxəli şəkildə davam etdirilir. Qəza zamanı kafenin bağlı və içərisinin boş olduğu, sürücünün isə avtomobildə tək olduğu qeyd olunub.

Yerli sakinlər bildiriblər ki, hadisə daha gur bir saatda baş versəydi, nəticələr çox daha ağır ola bilərdi.

Telegramda izləyin