Həvəsi sonu oldu! 6 metrlik divara dırmanaraq şir qəfəsinə girdi – sonrası faciə

Braziliyada yerləşən bir zooparkda gənc kişi dişi şirin hücumuna məruz qalaraq həyatını itirib. Hadisə Joao Pessoa şəhərindəki Arruda Camara Zooparkında baş verib.

Sonxeber.az xarici mediaya istinadən xəbər verir ki, 19 yaşlı Gerson Machado, şirlərə olan həddindən artıq marağı ilə tanınırdı. O, daha əvvəl də dəfələrlə zooparklara icazəsiz daxil olmağa cəhd etmiş, hətta Afrikaya gedib şir tərbiyəçisi olmaq istəmişdi. Bir dəfə təyyarənin şassi hissəsinə gizlənərək qitəyə qaçmağa cəhd edən Machado polis tərəfindən saxlanılmışdı.

Çətin uşaqlıq keçirən Machado həyatının böyük hissəsini dövlət himayəsində keçirmişdi. Anasının şizofreniya xəstəsi olması və ailədəki psixoloji çətinliklər səbəbilə heç bir ailə tərəfindən övladlığa götürülməmişdi.

Hadisə günü Machado zooparkın təxminən 6 metr hündürlüyündəki divarını aşaraq içəri keçib, daha sonra ağacdan tutaraq dişi şirin olduğu bölməyə enib. Ziyarətçilər çığıraraq panikaya düşüb, təhlükəsizlik xidməti müdaxilə etməyə çalışsa da, hər şey saniyələr içində baş verib. Dişi şir gəncə yaxınlaşdığı anda hücum edib.

Zooparkın baytarı Tiago Neri, hadisədən sonra şirin ciddi stress keçirdiyini, lakin sakitləşdirici iynə vurulmadan qəfəsinə qaytarıldığını bildirib. Bələdiyyə, araşdırma bitənədək zooparkın bağlandığını açıqlayıb.

Faciəli hadisə həm gənc adamın dramatik həyat hekayəsini, həm də vəhşi heyvanlarla bağlı təhlükəsizlik qaydalarının əhəmiyyətini bir daha göz önünə sərdi.

Telegramda izləyin